Nordisk Koncertkor ukiunik 15-inngortorsiorpoq
Nordisk Koncertkorimi erinarsoqataasarput angutit arnallu 18-65-it akornanni ukiullit 40-t missaanniipput, taakku tamarmik Nuumi najugaqarput, nunanilli assigiinngitsuneersuullutik, erinarsortartoqatigiit ukioq manna ukiunik 15-inngortorsiorput, tassungalu atatillugu tusarnaartitseqattaarniarlutik.
Nordisk Koncertkor, Nuummi najugaqartoq ukiunik 15-inngortorsiornini nalliuttorsiutiginiarlugu ukioq naallugu tusarnaartitseqataassaaq.
Tusarnaartitsineq siulleq sapaammi maajip qulingiluaani GUX-ip inersuaani nal. 15 aallartinneqassaaq, Nordisk Koncertkorilu juunip 13-iani Kapisilinnukassaaq, taassumalu oqaluffiani nal. 15.00 erinarsorlutik tusarnaartitsissallutik.
Erinarsoqatigiit nunani avannarlerni erinarsuutit pitsaanerpaat assigiinngitsut tusarnaartitsissutigisarpaat. Erinarsuutigineqartartut amerlasuutigut nunani avannarlerni tamani erinarsuutinik nipilersuutinillu tunngaveqartarput, aammali nunani ataasiakkaani immikkut tunngavilinni erinarsuutinik tusarnaartitsisarlutik.
- Nordisk Koncertkorimi erinarsortartut ukiuni 15-ini ataqatigiissimapput, nunanilu avannarlerni erinarsornermik nuannarisaqaqatigiinnerup aamma nammineq oqaatsitsinnik ataqqinninnerup ukiorpassuarni ingerlaannartissinnaasimavaatigut. Nuannaarutigisarparput nutaanik ilaasortaqalersarnera, siulersuisuni siulittaasoq Zenica Gosvig Larsen oqarpoq.
Erinarsortartoqatigiit ukiut ingerlaneranni ilisimaneqarluartunik peqateqarlutik tusarnaartitsisarsimapput, soorlu assersuutigalugit Rasmus Lyberth, Nanook aamma operamik erinarsortartoq Josef Josefsen.
- Erinarsortartoqatigiit ukiup ingerlanerani oqaatsit assigiinngitsorpassuit atorlugit tusarnaartitsisarnertik nuannarisarpaat – tusarnaartullu peqatigalugit nuannisartaqalutik, tamannalumi nalunaaquttap akunnerpassuini sungiusartarsimanermut naapertuulluinnarpoq. Ukioq manna tusarnaartitsisarnissatsinnut inuppassuit takkuttarnissaat neriuutigaarput, erinarsortartoqatigiinni pattattartoq Karen Bøhrnsen naggasiilluni oqarpoq.
Nalliuttorsiornermut atatillugu tusarnaartitsinerit akeqanngitsumik iserfigineqarsinnaapput, kikkullu tamarmik tikilluaqqusaallutik, erinarsortartoqatigiinnit ukiut ingerlaneranni aningaasaliissuteqartarsimasunut suleqatigineqartarsimasunullu tamanut qujassuteqartuni oqaatigineqarpoq.
Innuttaasut soqutiginnittut erinarsortartoqatigiit Facebookiat aqqutigalugu malinnaasinnaapput.
Erinarsortartoqatigiit ukiut ingerlaneranni immikkut ittumik tusarnaartitsisimanerisa ilaat videomi tulliuttumi takuneqarsinnaavoq: