nipilersorneq
Nordisk Koncertkor GUX-imi ilinniartut workshopperfigaat
Nuummi GUX-imi nipilersornermik ilinniartut sapaatit akunnerata naanerani immikkut misigisaqarput. Nordisk Koncertkor ilinniartunut workshoppertitsipput
Erinarsoqatigiit nuannarineqarluartut, Nordisk Koncertkor erinarsoqatigiinni aqutsisoq Bente Colding Jørgensen siuttoralugu sapaatiummat ualikkut ilinniartut nipilersornermik ilinniartartut workshoppertippaat. Erinarsoqatigiit paasissutissiipput.
- Erinarsoqatigiit ilinniarnertuunngorniarfimmilu nipilersornermut ilinniartitsisuisa suleqatigiillutik workshop aaqqissuuppaat. Nordisk Koncertkorikkut pingasunngornerit tamaasa GUX-ip aula-ni sungiusartarput – inimillu atortarnertik qujassutiginiarlugu ilinniarnertuunngorniarfik taama tunissuteqarfigaat, erinarsoqatigiit tusagassiuutinut nalunaarummi allapput.
Aamma atuaruk:
Nuannarineqartoq
Taamaasillutik Nuummi nipilersornermik ilinniartut, Bente Colding-Jørgensenip – ulluinnarni Musikkonservatorietimi Københavnimiittumi ilinniartitsisoq – Nordisk Koncertkorimut aqutsisuujartorluni Nuummukakulanera nuannaarutigaat.
- Assut nuannaarutigaarput erinarsoqatgiit Nordisk Koncerkoritut ittut ilinniartuutitta ilinniartinneqarnerinut taama soqutiginnitsiginerat, qularinngilaralu nipilersornermik ilinniartut Bente erinarsoqatigiillu suleqatigilluarnerisigut pissarsilluarsimassasut. Aallussilluarnerat takullugu nuanneqaqaaq, nipilersornermik ilinniartitsisolq Mette Toftdahl oqarpoq.
Ilinniartitsinerni marlunni timi atorlugu qanoq kissasserluarnissaq aammalu erinarsoriaatsit assigiinngitsut pingasut siulleq klassisk: "Händel over" tullertut Angup atugaa ”Lost at sea” kiisalu Coldplayikkut atugaat ”Viva la vida”, erinarsoqatigiit siulersuisui paasissutissiipput.
Nipilersorusuttut
- Ilinniartut nipilersornermut soqutigisaqarluartuunerat misigisalugu assut nuannerpoq, Bente Colding-Jørgensen oqarpoq.
- Nipilersoriaasiallu assigiinngikkaluaqisuoq isumaqarpunga akunnerni marlunni angusaqangaatsiarsimalluta. Assut malugineqarsinnaavoq inuussuttut nipilersorusussuseqarnerat tunniussassaqarnerallu, erinarsoqatigiinni aqutsisoq oqarpoq.
Bente Colding-Jørgensen Nordisk Koncertkorikkut, Nuuk Nordisk Kulturfestival ulloq. 16. oktober Katuami ingerlanneqalerpat, ammaanersiorluni tusarnaartitsinissaannut sungiusaajartorlunil Nuummut tikeraarpoq.