Nordic Investment Bank kalaallit mittarfiinut aningaasaliissaaq

Nordic Investment Bank, NIB, Kalaallit Airportsilu Ilulissani Nuummi mittarfiliornernut aningaasaliinissamut isumaqatigiissuteqarput.

Isumaqatigiissut naapertorlugu NIB-p Kalaallit Airports 450 milliuunit koruuninik aningaasanik atukkissavaa, taakkulu ukiuni 20-ni tulliuttuni akilersugassanngortinneqassallutik.

NIB tusagassiutinut nalunaaruteqarluni taama ilisimatitsivoq.

Nordic Investment Bank tassaavoq aningaasaateqarfik aningaasaliisartoq, nunanit avannarlernit arfineq-pingasunit pigineqartoq, taakkununnga ilaallutik Danmark aamma Norge. Aningaasaateqarfik aningaasaliisartoq suliffeqarfinnut namminersortunut pisortallu pigisaannut, nunat ilaasortaasut iluanni avataaniluunniit inissisimasunut aningaasaliisarpoq.

Aningaasaliineq

NIB Nuummi Ilulissanilu mittarfissanut aningaasaliissaaq, taakkununnga timmisartunik inissiisarfik nutaaq, utaqqisarfik nutaaq kiisalu napasuliaq mitsitsisarfik nutaaq aningaasaliiffigisatut ilaatinneqarlutik.

- Kalaallit Nunaanni attaveqaatit pingaaruteqarnerpaat amerlineqarpata niuernermi aporfiit ikilisinneqassapput, unammilleqatigiinneq annerulissalluni, aalisarnikkut, aatsitassarsiornikkut, pinngortitamut takornariartitsinikkut ilisimatusarnikkullu aningaasarsiorfissat amerlissallutik, NIB-mi siulittaasoq Henrik Normann, tusagassiutinut nalunaarut naapertorlugu oqarpoq.

Mittarfissat 66,67 procentii Namminersorlutik Oqartussanit pigineqassaaaq, 33,33 procentiilu danskit naalagaaffiannit pigineqassalluni.

Powered by Labrador CMS