NORA ukiamut nutaamik pisortartaassaaq

45-nik ukiulik Halla Nolsøe Poulsen Savalimmiuneersoq NORA-mi 1. septemberimiit pisortanngussaaq.

Nordisk Atlantsamarbejde, NORA, pisortaq Ásmundur Guðjónsson soraarpat, taartissaanik nassaarpoq.

Halla Nolsøe Poulsen Savalimmiuneersoq 45-nik ukiulik, Københavns Universitetiani Cand.Scient.Pol.-imik ilinniarsimasoq, suliniutinillu aqutsinermik misilittagalik 1. september pisortanngussaaq.

NORA nittartakkamini taama ilisimatitsivoq.

Halla Nolsøe Poulsen Savalimmiut Reykjavikkimi aallartitaqarfiani pisortatut atorfimmiit NORA-mut nuussaaq.

Nunat avannarlerni suleqatigiinnermik misilittagalik

NORA Nordisk Ministerrådip naalakkersuinikkut suleqatigiiffigaa, suleqatigiiullutik Kalaallit Nunaat, Island, Savalimmiut Norgellu sineriaa.

Pisortanngortussat nunat avannarliit suleqatigiinnerannik misilittagaqarluartuusoq, NORA allappoq.

- Nunat Avannarliit Siunnersuisoqatigiiffiata Allattoqarfiani siunnersortitut atorfeqarsimavoq, Thorshavnimi Lagmandip allaffiani siunnersortaasimalluni, aammalu Savalimmiuni nunanut allanut tunngasunut inuussutissarsiornermullu ministeriaqarfimmi Savalimmiut nunat avannarlernut suleqatigiinnerannut immikkoortortaqarfimmi atorfeqarsimalluni, NORA allappoq.

Halla Nolsøe Poulsenip Ásmundur Guðjónsson ukiuni arfineq-pingasuni pisortaasimasoq paarlassavaa.

Powered by Labrador CMS