Noorartut unammillertitsipput
Ilimaginngisamik tassanngaannartumillu illoqarfiit pingaarnersaannut noorarnerit Kommuneqarfik Sermersuumut arlalitsigut unammillernarpoq
Nuummut nuunnissaq nuannarineqarluinnarlersimavoq. Ukioq nutaap aallartinneraniit illoqarfiit pingaarnersaanni innuttaasut 241-nik amerlisimapput.
Innuttaasut Nuummut nuuttut:
Januar: 64
Februar: 113
Marts: 64
Piffissami sivikitsuinnarmi taamaattoqassava? Imaluunniit noorartut amerliartuinnassapput kommunimullu arlalitsigut unammillernarnerulerluni.
Malinnaasimanngilagut
Kommunaldirektørip Lars Møller-Sørensenip qularutiginngilaa kommuni “malinnaasimanngimmat”. Aap illoqarfiit pingaarnersaanni periusissiaq (2016 aaqq.) kingusinaartumik aallartinneqarpoq, nuuttumi pisariaqartitaat atuarfiit, paaqqinnittarfiit inissiallu sivisuumik sanaartorneqartarput.
- NCD (kommunip ineriartortinneqarnissaanut ingerlatseqatigiiffik aaqq.) 2. oktober 2017-imi pilersipparput, kommunaldirektøri NCD-mi siulersuisuini siulittaasoq oqarpoq.
Paaqqinnittarfiit unammillerneqartut
Taassuma nassuerutigaa, ulloq unnuarlu paaqqinnittarfiit kommunimit unammillernartoqartinneqartut. Taamaammat innuttaasut nussornerata malitsigisaanik ingerlaannaq pilersinneqartussanik barakkitut ittunik paaqqinnittarfinnik pilersitsisoqarsinnaanera isumaliutersuutigineqarpoq.
- Atuarfeqarnikkut inissisimalluarpugut. Taamaakkaluartoq Atuarfik Hans Lyngemi atuartut amerlassusaat 300-niit 500-nut amerlisariaqarsimavagutm Lars Møller-Sørensen oqarpoq, tikkuarpaalu NCD-p illoqarfimmi atuarfimmik nutaamik atuartunut 1.200-nut inissalimmik pilersaarut aallartinneqarsimasoq. Atuarfittaassap sanaartorneqarnissaa ukiup naalernerani pinissaa naatsorsuutaavoq.
Kinguartitsineq
Namminersorlutik Oqartussallu piginneqatigiilluni inissiat sanaartorneqarnissaannut aningaasaliissutissanik kinguartitsisimanerat akisunaarneqarpoq, tassani ulloq unnuarlu paaqqinnittarfiit ilanngunneqarnissaat pilersaarutaasimangaluarpoq. Piginneqatigiilluni inissiat naluttarfiup Malik eqqaaniittuumi ukiumik ataatsimik kinguartinneqarput, ullualunnguillu matuma siorna naluttarfiup eqqaaniittut sanaartorneri aatsaat aallartinneqarput.
- Upernaaqqippat naluttarfiup eqqaani naammassinissaq pilersaarutaasimangaluarpoq. Massakkullu kingusinnerpaamik 2021-mi naammassineqartussanngorput, Lars Møller-Sørensen paasissutissiivoq.
Illoqarfiit pingaarnersaanni pilersaarut
NCD-p aamma illoqarfiit pingaarnersaanni periusissiap uku 2030-p tungaanut naammassissavaat:
Inissiat 1.600 – taakkunannga 400 pisortaniissapput
Ulloq unnuarlu paaqqinnittarfiit qulit missaanni – mikinerillu sisamat matuneqassapput
Illoqarfimmi atuarfik 1.200-nut inissalik
Atuarfik Hans Lynge 1.000-nut inissaqarsilerlugu alliliineq
Siorarsiorfimmi atuarfik nutaaq 1.200-nut inissalik
Atuarfiit pingasut tamarmik sunngiffimmi aaqqissuussiveqassapput – AKO
- Inuussutissarsiortullu inissianik sanaartorlualereerput. Aammattaaq NCD pilersaarutinik pissaganartunik suliaqalereerpoq, kommunaldirektøri erseqqissaavoq, taassuma tikkuarpaa Nuuk Centerip allilerneqarnissaa tassani paaqqinnittarfiit, inissiat suliffeqarfinnullu inissat ilaatinneqassapput.
Anguniagaqarluarpugut?
- Ukioq mannamisuulli noorartut ingeerlaannassapput periusissiarput naammannersoq apeqquterujussuuvoq, Lars Møller-Sørensen erseqqissaavoq.
Aalajangiinissamullu tunngavilersorluakkamik pissarserusulluni 2018-imi 2019-imilu kvartalimi siullermi kikkut Nuummut nuussimanersut paasiniarlugu Naatsorsueqqissaartarfimmut apeqqutilliisimavoq.
- Ukioqqortussusaat, isertitaat, suminngaanneernerat illoqatigiillu amerlassusaat ilisimasariaqarpagut. Nuussimasunut aamma tamanna atuupput, kommunaldirektøri paasissutissiivoq, taassuma assersuutigalugu tikkuarpaa kommunimut unammillernarsinnaasut, tassa nuunnermi 1. september sioqqullugu kingusinnerusukkulluunniit pisimanersoq.
- Kalaallit Nunaanni kommunimit allamiit 1. september kingorna nussimaguit ukiup tulliani akileraarfiusumi aatsaat akileraarutit aatsaat iluanaarutigilersinnaavagut. Qallunaajuppallu ulloq nuunneraniit akileraarutaat iluanaarutigisinnaavagut, kommunaldirektøri nassuiaavoq.
Illoqarfiup pilerinartup illersornissaa
Illoqarfiit pingaarnersaata soqutigineqaleraluttuinnarnera, Lars Møller-Sørensenip ajoriffissaqartinngilaa.
- Pingaaruteqarpoq, illoqarfiup pilerinartup attatiinnarnissaa taamaaliornikkut assersuutigalugu kalaallit ilinniagaqarluarsimasut Qallunaat Nunaanniit tikisissinnaalissavagut. Illoqarfik ineriartortissavarput. Mittarfissuartaarnissarlu ineriartoqqinnermik aamma malitseqartussaavoq, tamannalu periusissiami anguniakkat naammannersut apeqquserneqarsinnaavoq, Lars Møller-Sørensen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...