Pisinnaasut pilliuteqassapput
Maliina Abelsen kommunalbestyrelsip ataatsimiittarfiani aningaasaqarnikkut politikikkullu ingerlatsineq pillugu nalunaarut
Piffissami matumani Kalaallit Nunaanni isumaliuusissiissutit, nalunaarutit aamma nalunaarusiat imaaginnavipput, taakkulu tamarmik iliuuseqartoqanngippat siunissaq tarrajuttoq eqqartorpaat: Aningaasaqarnermut Isumalioqatigiissitaq, Akileraartarnermut Atugarissaarnermullu Ataatsimiititaliaq, Nunap Immikkoortuini Ineriartortitsinissamut pilersaarut – kiisalu maannakkut Aningaasaqarnikkut ingerlatsineq pillugu nalunaarut 2011, Aningaasaqarnermut naalakkersuisumit Maliina Abelsenimit, Inuiat Ataqatigiit, saqqummiunneqarpoq Nuummi kommunalbestyrelsip ataatsimiittarfiani tallimanngormat ualikkut.
Maliina Abelsenip aammattaaq erseqqissarpaa atugarissaarnerput tatisimaneqartoq: - Nunatsinni tunisassiorneq aamma ingerlatsineq annikippallaarput aamma innuttaasuni ukioqqortussutsip agguataarneqarnerata kingunerisaanik utoqqaat amerlanerulissapput sulisinnaasullu ikinnerulissallutik. Unammilligassat annertoorujussuupput nakorsaatissarlu atorsinnaasutuaq tassaavoq inuiaqatigiit tamakkerlugit aningaasaqarniarnikkut annertusiartortitsineq.
Politikkikkut sulinerup annertunersaa uninngagallarsimavoq Akileraartarnermut Atugarissaarnermullu Ataatsimiititaliarsuup aamma Assartuineq pillugu Isumalioqatigiissitap naammassinissaasa utaqqineranni. Maannakkulli isumaliuutissiissutit qarmasissiatut issutigisut inassuteqaatitallit tiguavut, tamakkulu arlalitsigut inuiaqatigiit kalaallit allanngortissavai: - Anguniartariaqarparput allannguisoqarneratigut pitsanngortoqarnissaa, Maliina Abelsen oqarpoq.
Unammilligassaq tassaavoq iluarsiissutissat Nunatsinni atugarissaarnissamik qulakkeerinnittut – aammattaaq ukiut 30-t qaangiuppata. Innuttaasut aappaatigut periarfissinneqassapput atugarissaarnerup iluaqutaanik illuatungaatigullu periarfissinneqassapput inuiaqatigiinni atugarissaarnerup atatiinnarnissaanut pilliuteqarnerunissamut: - Taamaattumik tunngaviusumik inuiaqatigiinnut pisussaaffiuvoq pisinnaasut pilliuteqarnerunissaat, Maliina Abelsen oqarpoq.
Aningaasaqarnikkut ingerlatsineq pillugu nalunaarut 2011 aammattaaq soqutiginarpoq, taannami Naalakkersuisut 2012-imi aningaasaqarnermut inatsimmut, aggustimi saqqummiunneqartussamut, siunnersuutissaannut tunngatillugu suliaqarnissaannut attuumassuteqarmat.