Sermersuup aakkiartornera sukkaqaaq

Kalaallit Nunaata sermersua sukkasoorujussuarmik aakkiartorpoq. Sillimmartaarnartumik 2010 rekortiliiffiuvoq.

Danskit Sermersuarmik nakkutilliinissamik pilersaarusiaat ukioq qaangiuttoq pillugu nalilersueqqammerput. Uuttuinerillu sillimmartaarnarput: Ukiut 30-t matuma siornatigut uuttortaasarneq aallartinneqarmalli aakkiartorneq taamak maannakkutut annertutigisaimanngilaq.

Weekendavisen taamatut allaaserisaqarpoq.

Qallunaat Nunaanni Kalaallit Nunaannilu Ujarassiuut Misissuisoqarfiata (GEUS) annertunerusumik sivisunerusumillu aasaanerani aakkiartornermik paasisaqarpoq kiisalu iluliarujussuit Kalaallit Nunaanni serminit iigartarlutik tamannalu rekortiulluni.

Tamatumunnga pissutaavoq 2010-mi Kalaallit Nunaata kiarujussuarneranik ukiuunera kiappoq, aasaaneralu kialluni kiisalu siallinngingajavillunilu nittaanngingajavippoq.

Assersuutigalugu Kujataani silasiorfimmi sermersuup meterinik qulingiluanik isorartutigisumik aassimanerani paasineqarpoq, tamaani ilisimatusarnermik suliallit nalinginnaasumik ukiumut meterit arfinillit uuttortaraluarpaat. Tassa annertuseriaat 50 procentiulluni.

- Eqqarsaatigilaariaruk februaarip qaamataani Sermersuarmiillutit sapaatillu akunnerini arlalinni malittuinnarni issangiartoq. Tamanna pisoq immikkut illuinnartuuvoq, Andreas P. Ahlstrøm, GEUSimi seniorforskeritut atorfeqartoq, Weekendavisenimut oqarpoq.

- Maannakkut maanga killippugut oqarsinnaajunnaarluta Sermersuup aakkiartornerata sukkanerujussuuata qoqassigaatigut, seniorforskeri oqarpoq nangillunilu:

- Tassami ukiut qulikkaat ingerlanerinnaanni pingajussaannik Sermersuup rekortiliilluni aakkiartornera malugaarput.

Andreas P. Ahlstrømip qularutiginngilaa sermersuup annertunerusumik aakkiartorneranut pissutaasoq nunarsuup kissatsikkiartuaarnera.

- Tassa pissutsinut allanut ingerlavugut. Apeqqutaasoq tassaavoq suna tikileraluttualeripput, oqarpoq.

Silaannaap allanngoriartornera pillugu oqallinnermi annilaanganartoq uteqqiartuartoq tassaavoq Kalaallit Nunaanni sermersuaq tamarmi aassagaluarpat nunarsuarmi imarpissuit meterinik arfineq marlunnik qaffannissaat.

Kisianni naak paasissutissat danskit katersugaat tunngavigalugit sermersuaq aakkiartupilooraluartoq, taava ukiut tusinderpassuit aatsaat ingerlareerpata Sermersuaq tamakkerluni aassimassaaq, Andreas P. Ahlstrøm naqissusiivoq.