Nunarput ulorianartorsiussaaaq
Issittup imartaani russit atomimik nukissiorfiliaanit puttasunit aniasoornikkut issittup imartaa eqqorneqassaaq, Nordisk Rådimi Avatangiisinut Pinngortitamullu Ataatsimiititaliami ilaasortaq Kristen Touborg (SF) isumaqarpoq
Ruslandip atomimik nukissiorfinnik puttasup, issittup imartaaniittussanik, sananiarnera nutaarsiassaanngilaq.
Atomimik nukissiorfiit puttasut 11-it Ruslandip avannarpasissortaa innaallagissamik pilersussavaat. Atomimik nukissiorfiit aamma Siberiami provinsimi Sakha-mi, 1 millioninik inulimmi, aatsitassarsiornermik aallartitsissapput. Nunarsuarmi atomimik nukissiorfiit puttasuliat siullersarissavaat. Atomimik nukissiorfiup maanna matuneqarsimasup Barsebäckip piginnaasaata 1/10-ianik nukissiorsinnaassapput.
Japanimi atomimik nukissiorfinni ajunaarnersuaq pissutigalugu Nordisk Råd mianersoqqussuteqalerpoq. Nordisk Rådimi Avatangiisinut Pinngortitamullu Ataatrsimiititaliami ilaasortaq Kristen Touborg isumaqarpoq isumannaatsuunerup samminerulernissaa pisariaqartoq.
- Qanorluunniit pisoqarsinnaavoq tamakkiisumillu qulakkiisoqarsinnaanngilaq ajornaarnersuaqaqqissanngitsoq, assersuutigalugu pinerleeriarnikkut, Kristen Touborg oqarpoq.
- Aamma Kalaallit Nunaat ulorianartorsiussaaq Ruslandip avannaani ajunaarnersuaqassagaluarpat. Ruslandimit immap sarfai issittup imartaata annersaa aqqusaarpaat, aamma Tunu Kitaalu, Kristen Touborg oqarpoq, ilanngullugulu oqaatigaa Nordisk Rådip Avatangiisinut Ataatsimiititaliaa Ruslandimi Tuluillu Nunaanni atomimik nukissiorfiit isumannaatsuunerat pillugu ataatsimiinnermi peqataassasoq.
Touborgip isumaa malillugu ineriartorneq quianaannartoq aallartinneqarsimasoq:
- Siullermik silap pissusiata allanngoriartornera pissutigalugu ilulissat nungukkiartorput kingornalu ilulissat atomimik nukissiorfinnik puttasunik taarserniarneqarput. Puttasuliat ajunaarnersuarmik kinguneqarsinnaapput, Kristen Touborg oqarpoq.
Qallunaat Verdensnaturfondenimi issittumi sulisuisa Anne-Marie Bjergip ernumanartoqartitsinini siusinnerusukkut DR-imi oqaatigaa.
- Ilisimanngilarput tamanna sikuerutissanersoq, tamannalu peqatigalugu ilisimaneqarpoq sila allanngorarnerulissasoq. Pissutsit marluk taakkua atomimik nukissiorfiit tamaanga inissinnissaannut mianernartuupput, Anne-Marie Bjerg oqarpoq tikkuarlugulu Issittoq mingutsitsinermut malussajasuararsuusoq, assersuutigalugu radiop qinngorneranik.
- Tamanna silarlukkajuttorujussuuvoq piffissarujussuullu ilaani taartorujussuusarluni. Qaqutiguinnarlu seqinnarissumi ajutoortoqartarpoq, silarluttumi ajutoortoqarnerusarluni, taamaattoqarneranilu piffissaq sivisooq aatsaat ingerlareersoq mingutsitsineq pifssaagallartillugu pakkersimaarniarneqarsinnaavoq.
Tamanna peqatigalugu nroskit NGO-mik ingerlatsiviata Bellona-p nalunaarusiaq EU parlamentimut tunniussimavaa, tassuuna sakkortuumik mianersoqqussuteqartorluni, tassani oqaaseqartartup atomfysikerip Niels Bøhmerip norskit naalakkersuisui kajumissaarlugit tamanna Ruslandimik oqaloqatiginnissutigeqqullugu.