Upernaakkut ataatsimiinnerup naggataarnera
Ataatsimiinneq isumaqatigiinngiffioqisoq ullumi naggataarneqassaaq aalisarneq pillugu sivisuumik oqallinnermik
Ukioq manna upernaakkut ataatsimiinneq pingasunngornermi Nuummi kommunalbestyrelsip ataatsimiittarfiani naggataarneqartussaq, politikkikkut oqaluttuarisaanermi ilanngunneqassaaq oquk-ataatsimiinnertut taaneqarluni.
Sullivinnik nakkutilliisut ataasinngormat kingullermi inatsisartut ataatsimiittarfiat matuaat, tassani immikkut ittumik oqummik ulorianartumik oqoqalersimanera pissutigalugu. Erloqinartuunngitsuuppat tamanna quianartunngortissallugu pilerinaraluarpoq:
- Oquup ulorianartup sakkortuullu oqaluttarfinnit nuimanerpaamit oqaaserineqarsimasut annertunerpaartaat nassuiaateqarfigaalusooq!
Oquk Kalaallit Nunaata aningaasaqaneranik ajornartorsiortitsilersinnaavoq, tamanna Akileraartarneq Atugarissaarnerlu pillugit Isumalioqatigiissitap aamma Assartuussineq pillugu Isumalioqatigiissitap annertuunik unamminartoqarnerarneqartoq, tassami oquk quiassuaatissaanngilaq.
Inatsisartut ataatsimiinnerminni, nalunaaqutaq qulinut aallartittussami, KNR-ikkullu aallakaatinneqartussami, oqaluuserisassat qulingiluat oqaluuserissavaat, taakkunannga marluk akerleriissutissaqarfiulluartut aalisarnermut inatsisip allanngortinnissaanut tunngasut oqaluuserisassani kingullinngortinneqarsimasut. Tassa paragrafi Kalaallit Nunaanni sinerissami qanittumi aalisartuinnaanngitsut allalli aamma angallataatiminnik nutarterisinnaanerannut aningaasaliisinnaanerannut tunngasoq, aamma pisassarititanut killiliussap 10-miit 15 procentimut qaffanneqarnissanut tunngasoq. Aalisartut Piniartullu peqatigiiffiat, KNAPK, pisinnaajunnaarpoq, Siumullu siumut neriorsuereerpoq inatsisip kinguartinneqarnissaa tapersissallugu, qanorluunniit pisoqaraluarpat taamaallaat siullermeerlugu upernaakkut ataatsimiinnermi oqaluuserineqartussaasoq.
Allat oqallisigineqarluartussat taaneqarsinnaapput Demokraatit sinnerlugu ilaasortap Niels Thomsenip siunnersuutaa Nuummi, Sisimiuni aamma Ilulissani ivigaasanik qallikkanik arsaattarfeqalernissaa, aamma Siumup Malik Berthelsenip imeruersaatit qiimmassaatinik akullit - energidrikkenik taaneqartartut - meeqqanut inerteqqutaalernissaannut siunnersuutaa.
Inuup nammineersinnaassusaanik illersuisoq
Tamakku pitinnagit inatsisit allat inatsinillu allannguutissat allat inatsisartut akuereqqaassavaat.
Avatangiisit pillugit akitsuummut inatsit, ukiortaamiit ikummatissaq literimut 10 ørenik qaffanneqartoq maanna allanngortinniarneqalereerpoq. Polaroil, aalisariutinut, umiarsuarnut aamma immami qillerivinnut, orsussamik nioqquteqartartoq, unammillersinnaajunnaarpoq, pissutigalugu orsussamik pajuttartut suliffeqarfinniit allaneersut 3 sømilemik killeqarfiup iluani angalaneq ajormata - taamaalillunilu akitsuuserneqarsinnaanatik. Inatsimmik allanngortitsineq Polaroilip akitsuutitaqanngitsumik ikummatissamik nioqquteqarsinnaalissaaq. Illuatungaatigulli Nunatta Karsiata aningaasat 5 millionit koruunit missiliorlugit annaasassavai ukiumut.
Pisortanut akiitsut akilersinniarneqartarnerat pinaveersaartinneqarnissaallu pillugit inatsit allanngortinneqassaaq, taamaaliornikkut innuttaasut PBS-ikkut pinngitsoorani akilersuisalernissaat nammineq pisalerniassammat. Atassut qanorluunniit pinngitsaalisoqartarsinnaanermut akerliulluinnarpoq, siunnersuummullu akerliulluni, tassagooq inuup nammineersinnaassusaanik killilersuimmat. Partiit allat siunnersuut akiitsut qaffariartuinnarnerannik unitsitsisutut pitsaasutut isigaat.