Station Nordimi uuliakoorneq

Tunumi Station Nordimi orsussamik nuussinermut atatillugu 22.000 literimik timmisartunut orsussamik maangaannaq kuuttoqarpoq

Station Nordimi sulisut suleqatigalugit saliineq ingerlaannaq ingerlateqqinneqarpoq, taamaaliornikkut orsussaq sapinngisamik pitsaanerpaamik piiarneqarniassammat. Assi toqqorsivimmit: Polfoto

Thule Air Basemeersumit timmisartumit orsussamik nuussinermi apriilip aallaqqaataani unnukkut maangaannaq kuuttoqarnera pivoq. Ajutoorneq apriilip pingajuani 2011-mi paasineqarpoq tankit misissuiffigineqarmata. Kangilinnguani Sakkutooqarfiup piaarnerpaamik Namminersorlutik Oqartussat aamma illersornissamut qullersaqarfik pisoq pillugu kalerrippai.

Ajutoorneq pivoq orsussamik timmisartumit assartuummit tankimut normu 4-mut nuussinermut atatillugu, tanki ulikkaarpallaarluni nunamut maangaannaq nunamut tankip erngarnaveersaataanit kuussimavoq. Sapaatip akunnerata naanerani Station Nordimi silap ajornerujussua pissutigalugu, anorlerluni, apilluni aamma issittorujussuulluni, nalinginnaasumik misissuinermi uuttortaasoqarmata apriilip pingajuani 2011-mi aatsaat maangaannaq kuussimanera paasineqarpoq, taamatut allaaserisaqarpoq Forsvaret.

Ilimagineqarpoq uulia apummiiginnarnissaa maajip qiteqqunnerani aput atuuttulernissaata tungaanut. Taamaattumik uulip annertunerpaartaa apummit piiarneqarnissaa periarfissaqarpoq aputip aattulinnginnerani.

Avatangiisit pillugit iliuuseqarneq

Maangaannaq kuuttoqarsimanera paasineqaqqammersorlu aput mingutsitaq piiarneqarpoq. Aalannguunnera aamma sulisut ajoqusinnginnissaat eqqarsaatigalugit suliaq tamanna kingunitsianngua uniitsiinnartariaqarsimavoq sulisunut illersuutissaat atisat aqaguani Station Nordimukaanneqarnissaata tungaanut. Station Nord avatangiisinik annikitsumik mingutsitsinerit taamaallaat suliarinissaannut sakkussaqarpoq, taamaattumik ajornartorsiut tamanna atortuutiminik aaqqiivigisinnaanagu.

Mingutsitsinerup qanoq annertutiginera paasiniarlugu illersornissamut oqartussaasut - Forsvarets Bygnings- og Etablissementstjeneste - apriilip tallimaani Station Nordimukartitsivoq issittumi avatangiisit pillugit immikkut ilisimasalimmik.

Maangaannaq aniasoqarnerata kinguneri aamma saliinissaq nalilersuiffigineqassapput aggustimi misissueqqinnermi, silap tamanna ajornartinngippagu. Saleeqqinnissaq kalaallit avatangiisinut oqartussai peqatigilluinnarlugit ingerlanneqassaaq.

Powered by Labrador CMS