Imertortarit seernartumillu ajoquserneqarnissaat pinngitsoortillugu

Nuummi Kigutileriffik atuarfinni ilinniartitsisarpoq ilinniarfiillu arlaqartut pulaartarlugit

Kigutitit paarikkit, inuuneq naallugu atortussaavatit, kajumissaarut ullumi taamatut oqaasertaqarpoq. Assiliisoq: Leiff Josefsen

Nunatsinni ulloq kigutigissarfimmut atatillugu Nuummi Kigutileriffik arlalinnik aaqqissuussaqarpoq.

Ukioq manna immikkut sammisaq tassaavoq sodavanditorpallaarnermi kigutit seernartumik (syremik) ajoquserneqartarnerat, taamatut oqaluttuarpoq Nuummi Kigutileriffiup pisortaa, Sabina Eugenius.

- Kigutileriffimmi ajoraluartumik naammattoortuartarpagut kigutit syremik ajoqusersimasut, inuusuttuunerujartuinnartut kisiisa akornanniunngitsoq aammali atuartut anginerit akornanni, oqarpoq.

- Taamaattumik syremik ajoquserneqartanrerat qitiutipparput taamatut ajoquserneqartarnerat pinngitsoortinniarlugu imaluunniit inuit kigutaasa syremik ajoquserneqartarnerat annikillisarniarlugu.

- Taamatut ajoqusernerit pisarput nerisassanik imigassanillu ph-mik akukitsutortarnikkut, tassa nerisassat seernartutallit, Sabina Gabrielsen oqarpoq.

Allagartarsualiortoqarpoq nerisassat assigiinngitsut qanoq annertutigisumik seernartoqarnerannik nalunaartumik kiisalu allagartarsualiortoqarluni imermik imertaqqusinermik oqariartuutilimmik.

- Atuarfinni 8., 9. aamma 10. klassimi atuartunut seernartunik ajoquserneqartarneq pillugu atuartitsisoqarnissaa aaqqissuupparput. Atuartut misileraasassapput ph-mik uuttuinissamut aamma colamik, juicemik, red bullimik il.il. pillugit misileraasinneqartassallutik, Sabina Gabrielsen ilisimatitsivoq.

Taakku saniatigut Nuummi Kigutileriffik aamma aaqqissuussivoq ilinniarfinnut assigiinngitsunut pulaarnissamik, taakkunani inuusuttut oqariartuummik tusarlerneqarnissaat siunertaralugu.

Kigutileriffik ullumi makkunaniissaaq:

- Ilimmarfik, nal. 12:00 -13:00

- Piareersarfik, nal. 11:30 - 12:15

- Jern og Metal, nal. 11:30 - 13:00

- GU, nal. 11:30 - 12:15, kollegiami ilinniartut nerisarfianni aamma Kiviup aamma Singajiup akornanni igalaartalimmi.

- Peqqissaasunngorniat ilinniarfianni nal. 11:45 -12:30

- Tassani nerisassat seernartullit suuneri saqqummiutissavarput seernartunillu ajoqusinnginnissamut siunnersuutit pitsaasut saqqummiullugit, Sabina Gabrielsen Nuummi Kigutileriffimmit taamak oqarpoq.

Powered by Labrador CMS