Seernartut qitiutillugit
Ullumi tassa kigutigissarfik
Apriilip 15-iat nuna tamakkerlugu kigutissarnermut ullorititaasoq tallimassaat malunnartinneqassaaq. Ukioq manna imeruersaatit nerisassallu seernaqarpallaat kigutinik aseruisarnerat inuusuttunut oqariartuutigineqassaaq.
- Kigutilerinermik suliallit pinaveersaartitsinermik annertuumik pitsaasumillu suliaqarput. Ukiuni kingullerni kigutigissuunissaq anguniarlugu pissusissanik tunngaviliiniarnermi, meeqqanik angajoqqaanillu suleqateqarneq annertusaavigineqarsimasoq amerlasuunillu nuannaarutigineqartoq ilisimavara, peqqissutsimut Naalakkersuisoq Agathe Fontain oqarpoq nangillunilu:
- Ukiumoortumik kigutigissarnermut ulloqartitsisarneq kigutigissuunissaq pillugu suliniuteqarnermi pingaaruteqaqataavoq. Seernaqarpallaanik imeruersarnikkut nerisaqarnikkullu inuusuttut kigutaasa aseroriartortarnerat ukioq manna sammineqassammat nuannaarutigeqaara. Sodavand inuusuttorpassuarnit annertuumik imigarineqarpoq kigutinillu ajoqusiisinnaanerata inuusuttunit ilisimaneqarnissaa pingaaruteqarluni.
Seernap aseruisarnera
Ukioq manna pisarnertut kigutigissaanermik suliallit ullormi kigutigissarfimmi atugassanik paasissutissiissusiorsimapput. Ukioq manna seernap kigutinik aseruisinnaanera pillugu paasissutissat ilaatigut suliarineqarput. Nivinngagassiami ”suut kigutinik nungu-jartortitsisarpat” imeruersaatit nerisassallu assigiinngitsut seernamik qanoq annertutigi-sumik akoqarnerat takusinnaavat. Quppersakkami ”Qanoq seernartigaat?” nerisassat seernallit kigutinik putusisarnerat atuarsinnaavat, qanorlu iliornikkut kigutivit seernamit aserorneqannginnissaat pillugu siunnersortillutit.
Ulloq kigutigissarfik nuna tamakkerlugu malunnartinneqassaaq, ukiormannalu pisarnertut kikkunnut tamanut inuunertik naallugu kigutigissoorusuttunut siunnersuutit sisamat ilisimaneqalernissaat, kigutigissaanermik suliallit oqariartuutigissavaat:
? Ullaakkut unnukkullu kigutitit salilluartakkit
? Meeqqavit kigutai qulinik ukioqalernissaa tikillugu salittassavatit
? Kigutit qaqorsaataat sakkortuumik fluoritalik atortaruk,1450 ppm pitsaaneruvoq
? Ulluinnarni mamakujuit, safti sodavandillu pinaveersaakkit.