Kalaallit atiannik atsiineq iliuuseq kusanartuussaaq

Kunngikkormiut marlulissat ullumi kuisissapput, qanoq atserneqarnissaat tusagassiuutit allaaserisaqattaarpaat

"Niviarsiarannguaq" aamma "Nukappiarannguaq", taamatut angajoqqaaminnit maannamut taagorneqartut, sisamanik atertaassapput.

Kalaallit nalunaaqutaat naapertorlugu nalunaaqutaq 11.30 kunngikkormiut marlulissat Holmens Kirkemi kuisissapput, taamaattumik marlulissat tusagassiorfinni qitiutinneqassallutik. Kisianni qanoq atserneqassappat?

Oqaluttuarisaanermik ilisimasalik kunngikkormiullu pillugit immikkut ilisimasaqartutut EB-mut oqaaseqarpoq Lars Hovbakke Sørensen:

- Kronprinsikkut suli amigaatigaat Kalaallit Nunaannut, kronprinsep atttuumassuteqarfigilluagaanut, soqutiginninnertik takutissallugu kalaallit aqqannik atsiinermikkut. Taamatut iliorneq kusanartuussaaq, aappariit maannakkut atsiinermikkut kalaallit aqqannik ilanngussissagunik, oqaluttuarisaanermik ilisimasalik kunngikkormiullu pillugit immikkut ilisimasaqartoq, Lars Hovbakke Sørensen oqarpoq.

Marlulissat qanoq atserneqassappat?

København, Sisamanngorneq /Ritzau/

Kronprinsikkut aqqit ullutsinni atorneqartartut marlulissanik atsiinissaminnut toqqassavaat. Allanit allaanerussanngillat, ilutitillu assigissavaat.

Ritzaumut aqqinik ilisimatooq Birgit Eggert oqarpoq, Københavnip Universitetiani Institut for navneforskningimeersoq (aqqit pillugit ilisimatusarfimmeersoq):

- Aqqit ullumikkut atorneqartut toqqarnissaat ilimanarpoq, aqqit ullumikkut atorneqarnerusut eqqumiippallaanngitsullu. Isumaqarpunga marlulissat atinik ullumikkut atorneqartartunik atserneqassasut, immikkut ittuunngitsunik.

Prinsessimut eqqoriarpaa Anna, Emma imaluunniit Laura atsiunneqassasut. Aqqit nuannarineqartut meeqqerivimmi nunarsuatsinnilu atorneqarluarsinnaasut. Prinsimut eqqoriarpai: Marcus, Lucas imaluunniit immaqa Noah.

- Nukappiaqqat aqqi bibelimeersut uagutsinni Europallu sinnerani massakkut atsiutissalugit nuannarineqarput, Birgit Eggert oqarpoq innersuussutigalugillu Noah aamma Lucas Danmarkimi naatsorsueqqissaartarfiup naatsorsuutaani atsiunneqarnerpaasartuni normu 2-tut aamma 3-tut inissisimanerat.

Aamma siunissaq pillugu ilisimatusartup Liselotte Lyngsøp eqqoriarpai aqqit ullumikkut nuannarineqarluartut toqqarneqarnissaat, tassami kronprinsikkut takutikkusuppaat qitornatik allat danskit qitornaasulli peroriartortikkitik.

- Pingaartippaat takutissallugu allatulli ilaqutariittut inuuneqarnertik suliffeqarlutik qitornatillu meeqqerivimmiitittarlugit. Taamaattumik meeqqat aqqi siulliit nalinginnaasumut meeqqerivimmut kingornalu atuarfimmut tulluartuussapput, Liselotte Lyngsø oqarpoq.

"Niviarsiarannguaq" aamma "Nukappiarannguaq", maannamut angajoqqaavisa taaguutigisimavaat, maanna sisamanik ateqalissapput. Taamatut aamma ateqartinneqarput qatanngutaat angajulliit, Christian aamma Isabella, aatamik aamma aanamik aanaqqiimillu aqqinik atserneqartut.

Aamma Margrethe, Henrietta aamma Ingrid prinsesse Isabellap aterigaluarai aamma Valdemar, Henrik aamma John prins Christiap aterigaluara, taamaattoq kronprinsikkunnut akornutaanavianngilaq ilaquttat aqqinik atseeqqinnissaq. Kisianni ateq taaguutissarinngisaattut, Birgit Eggert naliliivoq.

- Kronprinsikkut isumaqarput qitornatik kunngikkormiut qitornaattut annertuumik 'nammataqareersut'. Taamaattumik isumaqarpunga namminneq atissaannik atsiissassasut, peroriartoratik Margrethaaqqatut imaluunniit Henriaqqatut, Birgit Eggert oqarpoq.

Pissanganeq qaassaaq danskit nalunaaqutaat malillugu nalunaaqutaq 15.30 Københavnimi Holmens Kirkemi kuisitsinermi.

Powered by Labrador CMS