Maaji peqqissuutiguk

Upernaleqaaq (neriuppugut). Taamaattumik Maaji Peqqissuutiguk aallarnerneqalerpoq pissanganartorpassuarnik aamma akeqanngitsunik aaqqissuussinertalik, Nuummi maajimi pisarnertut ingerlanneqartartut.

Ukiut tulleriit tallimat Maaji Peqqissuutiguk Nuummi innuttaasunut ingerlanneqartarpoq, misilittakkallu paasitippaat innuttaasorpassuaqartoq sulerusuttunik malinnaalluartunillu, Pia Sandholm Johnsen Nuummi Maaji Peqqissuutiguk-mi komitemeersoq oqarpoq.

Nuuk Ugeavisikkut aaqqissuussinerit peqqinnartut peqataaffigisinnaasatit pillugit malinnaasinnaavutit.

Nuummi Maaji Peqqissuutigumik suliniut 2011-mi ukiunik tallimanik ukioqalissaaq. Tassa 5 x maaji peqqissumik inuuneqarnissamik, nammineq kajumissutsimik suliniarnermik aamma illoqarfiup innuttaasuisa iluatsinnerannik, annertunerpaamik inunnit namminermit pisartoq, qitiutitsineq. Taamatut allaaserisaqarpoq Morten Jørgen Heilmann, Parnûna Heilmann Olesen aamma Jesper Olesen Maaji Peqqissuutigumi Komitemeersut Nuummi Niuertut peqatigiiffiannut aamma ukioq manna peqataanissaannut kajumissaarutiminni allagaqarlutik.

Taamanikkut Pikkori Sportimit Morten Jørgen Heilmann suleqatini peqatigalugit Maaji Peqqissuutigumik aallarniissuuvoq. Isumassarsiaq tamanna illoqarfinni allani aamma ingerlanneqartalersoq.

2010-mi 17.000-ingajaat peqataapput Nuummi aaqqissuussinerni 145-ni. 2009-miit marloriaatinngorluni. 2011-mi aaqqissuussinerit peqataasullu suli amerlanerunissaat neriuutigaarput, aallarniisut pingasut taamak allapput.

Maaji Peqqissuutiguk nammineq aallarnigaavoq, kisianni tassa iluatsitsilluarnerujussuaq annertusiartorneralu ilutigalugit suleqatissanik pissarsiornissaq pisariaqalerpoq. Qujanartoq tamanna kalaallit suliffeqarfiutaat soqutiginnikkiartornerat peqataarusunnerallu ilutigalugu pivoq Maaji Peqqissuutigullu nalileqartitaat tunngavigalugit.

CSR aamma inuiaqatigiinni akisussaaqataaneq ukiut aappaat avillugu tamani oqallinnermi annertusimavoq, suliffeqarfippassuillu namminneq suleqatimillu Maaji Peqqissuutigumi peqataanertik CSR-mi anguniakkamik ilaanniiitippaat. Tamannalu uagut ingerlateqqinnissaanut peqataaffigerusupparput, Maaji Peqqissuutigumi Komitemeersut pingasut taamak allapput.

Suliffeqarfiit ilaat, suliniummik tapersersuisoq, tassaavoq Air Greenland, peqqissumik inuuneqarnermik, suleqataasut atugarissaarnissaannik aamma najukkami peqataanermik nalunaaruteqarusuttoq.

- Maaji Peqqissuutiguk ukiuni kingullerni tamakku oqariartuutiginissaannut oqalliffissamik neqeroorfigaatigut. Uagutsinnut pingaarpoq peqataanissarput, naleqartitatsinnummi tamanna tunngaviulluarmat, kisianni aamma pilersaarutitsinni aamma CSR-mik pilersaarutitsinni, Air Greenlandimi pisortaaneq Michael Binzer oqarpoq.

- 2010-mi Air Greenland Maaji Peqqissuutigup tapiiffigineqarnerata saniatigut aaqqissuussinernut, soorlu atuartut arpatsinneqarneranni atuartunit 1.400-nit peqataaffigineqartumi, sulisut aningaasatigut annaasaqarfiunngitsumik peqataatitsinikkut tapersiivoq. Taakku saniatigut siorna illersuisumut, Joachim B. Olsenimut, aamma aaqqissuussinermi aningaasaliinermilu ikiuuppugut, Michael Binzer oqarpoq.

- Maaji Peqqissuutiguk suleqatigineratigut uagut piginnaasagut misilittakkagullu iluaqutigalugit peqqissumik inuuneqarnissamut oqariartuuteqarnerup siaruarnissaani ikiuuppugut. Namminneq kajumissusertik tunngavigalugu suleqataasut inuussutissarsiortut tapersersuinissaannik pisariaqartitsipput. Ukioq 2011-mi peqataaqqissaagut. Neriuppugullu suliffeqarfiit allat suliniut tamanna tapersersorumaaraat, Michael Binzer oqarpoq.