Aasamut kunngikkormiut tikeraarnissaat borgmesterip qilanaaraa
Qilanaaraarput Ataqqinartorsuup uiatalu Kunngikkormiutut Ataqqinassusillit tikilluaqqunissaat Paamiunut aamma Nuummut ukioq manna angalanissaannut, borgmester Asii Chemnitz Narup ullumi dronningip 71-inik ukioqalerneranut atatillugu pilluaqqussuteqarluni oqalugiarnermini
Asii chemnitz Narup ullumi dronning Margrethemut pilluaqqussuteqarpoq Nuutoqqami pisarnertut qamutilittartoqareermat.
- Dronningip uiatalu Prins Henriup ukioq mannassaaq Nunatsinnut tikeraarnissartik piffissaqarfigerusussimavaat - juulillu qaammataani nunatta aasarisseruttornerani aneernarsisaraangat tikeraartorissavagut. Ukiup taamaalinera nunatsinni ilaqutariippassuit asiartarfigaat, pinngortitaq inuuffigalugu – qaamaneq malugusuutigalugu unnuaaruttarfipput, ukiussamut pilisarfik, issileqqinnissaanut nukissanik nutaanik aallarfik. Ukiup taamaalinerata qaamarnga pinngortitarsuarlu Dronningip eqqumiitsuliortutut sulinermini isumassarsiorfigisinnaasaa pisuunnguallaatigisinnaasaalu.
- Kunngissakkut marluliaataasa ippassaani kuisinneranni tulluusimaaqataavugut – Ivalomik Minik-millu atserneqarnerat tuppalliutigalugussaaq. Meeqqat uatsinnut tamatsinnut erlinnarnerpaajupput taakkuupppullu uummatitta qinngorpiaani ineqartitagut. Kunngissakkut kalaallisut atsiinermikkut Nunatsinnut qilerutitik suli ningunerulersittutut ippaat soorlulusooq eqqarlimittut isigaluta. Tamanna attorneqaatigalugulu kinaassutsitsinnik nukittorsaavoq. Dronningip Nunatsinnut inuinillu tunniusimaneranik soqutiginninneranik asanninneranillu nangitsinertullusooq aamma isumaqartissallugu kukkunerussagunanngilaq, Asii Chemnitz Narup oqarpoq Ataqqinartorsuarlu Dronning Margrethe qulingiluariarlugu hurraarutigalugu.