Isumaqatigiissutitaarput
Nunatsinni kredsdommerit siullerpaamik namminnerminnut tunngasumik isumaqatigiissutitaarput.
Kredsdommerit peqatigiiffiata Domstolstyrelsenimik 2010-mi isumaqatiginninniareerluni isumaqatigiissut oktoberimi atsiorneqarpoq.
Marts 2010-mi kredsdommerit nutaat qulingiluat ukiuni pingasuni ilinniareerlutik ilinniarnertik naammassivaat. Taakkunannga arfineq marluk Kalaallit Nunaanni Eqqartuussiveqarfimmi atorfinipput.
Uani sapaatit akunneranni kredsdommerissat nutaat arfineq marluk aallartissapput, tamarmik kalaallit eqqartuussiveqarfianni atorfeqareersuupput. 1. januar 2010-meersoq eqqartuussinermut inatsisitaaq malillugu kredsdommerit Nunatsinni eqqartuussisartutut atorfeqassappata taava ilinniartitaaneq ingerlassimasariaqaraat.
Tamatuma saniatigut kredsdommerit ukiumoortumik ataatsimiinnerminni ataatsimeersuarput, aamma tassani kredsdommerinngorniartut ilaasortaallutik.
Ataatsimeersuarnermi siulersuisut nutaat toqqarneqarput, ukuusut:
Siulittaasoq, kredsdommer Myrna Lynge, siulittaasup tullia, kredsdommer Eleonora Steenholdt aamma aningaaserisoq, kredsdommerinngorniartoq Hans Henrik Olsen.