Kinaluunnit isumaginnittoqarfimmit inimik piumasaqaateqarsinnaanngilaq
Arlalippassuit isumaqartarput anisitaagunik hotelimut inissinneqarsinnaallutik
Kommuneqarfik Sermersuumi Isumaginninnermut ingerlatsiviata Meeqqanut ilaqutariinnullu immikkoortortaqarfia piffissami matumani inissianik attartortunik inissiaatileqatigiiffinnit Inimit aamma Iserimit attartorlugu inigisaminnit anisinneqarsimasunit ullut tamaasa saaffigineqartarpoq.
- Arlalippassuit isumaqartarput hotelimut inissinneqarsinnaallutik, inigisaminnit attartukkaminnit anisitaasimallutik, isumaginnittoqarfimmut inissianut atugassaritinneqartunut nuunnissamik tungaanut. Taamaattorli inissianit taakku ilaannut inissinneqarnissaminnut pisussaaffeqanngillat imaluunniit kommuneqarfiup akiligaanik hotelimut inissinneqarsinnaanatik, immikkoortortaqarfimmi pisortaq Mette Sonniks, Kommuneqarfik Sermersuup nittartagaani oqarpoq.
Inissianik attartortut akiligassaminnik kinguaattoorsimasut nalinginnaasumik inissianik isumaginninnermut atugassarititaasut ilaannut inissineqarsinnaanngillat, piumasaqaataasut taakkununnga naleqqutinngimmata. Inissianut taakkununnga utaqqisut amerlaqaat. Nalinginnaasumik ukiunit marluunniit tallimat tungaannut utaqqeriarlutik, taamaattumik qinnuteqartartut, inissiamut attartukkaminnut aatsaat isertersinnaasarput. Ilaqutariit kingusinnerusukkut akiligassatit akilereersimagunikkit kiisalu nalinginnaasumik inissarsiortutut allatsereersimagunik, tamanna piumasaqaataavoq isumaginnittoqarfik aqqutigalugu inissarsiorlutik qinnuteqarsinnaapput, ilaqutariit inissiamik taamaattumik tunisariaqartut akornanniikkunik.
Inissiat isumaginninnermut atorneqartussanngortinneqartartut amerlanngillat, tamatumunnga pissutaavoq inissiat anisitsiffiusut sisamassaat taamaallaat, isumaginninnermi atugassanngortinneqatarnerat.
- Inunnut taamaallaat inassutigisinnaavarput inissamik ajornartorsiuteqarnertik ilaquttatit aamma ikinngutitik ikiortigaligit iluarsiniarsarissagaat – imaluunniit inisimasuunissamik periarfissarsiussasut. Ajornerpaamik pisoqarpat neqeroorutigisinnaasarput tassatuaavoq meeqqanik utaqqiisaagallartumik inissiisinnaaneq, angajoqqaavisa inissamik ajornartorsiuteqarnertik pillugu iluarsiiniarneranni. Aaqqineq tamanna tulluartanngilaq aamma ilaqutariinnit kissaatigineqartanngilaq. Qaqutigorujussuarlu aatsaat taamatut pisoqartarpoq, immikkoortortaqarfimmi pisortaq oqarpoq.
Allaaserisaq tamaat atuarsinnaavat uani