KNAPK: Aalisarnermut inatsisissaq kinguartilli
KNAPK-mi siulersuisuunerisa siunnersuutit aalisarnermut inatsimmut nutaatut ikkunneqartussat akuersaarsinnaanngilaat
Kalaallit Nunaanni Aalisartut Piniartullu Kattuffiata, KNAPK-p, siulersuisuuneri ulluni makkunani Inatsisartunut ilaasortanik partiinillu aalisarnermut inatsisip nutarterniarneranut tunngatillugu arlaleriarlutik ataatsimeeqateqarput.
- Ataatsimeeqateqartarnerni KNAPK-mi siulersuisuunerit partiinut tamanut erseqqissaatigaat, maannamut aalisarnermut naalakkersuisup Ane Hansen-p aalisarnermut inatsimmut nutaatut ikkunneqartussatut siunnersuutai, KNAPK-p ilaasortaasalu isumaqatiginngimmatigit. KNAPK-mi siulersuisuunerit piumasaqaatigaat tassunga tunngasut oqallisigineqartussat aappaagumut kinguarteqqullugit apeqqutit inuiaqatigiinniit oqallisigilluarneqarnissaat siunissamilu aalisariutitaanissamut aningaasalersueriaasissanik naleqqunnerusunik misissueqqaarluarnissaq pisariaqarluinnarmat, Leif Fontaine, siulersuunerit sinnerlugit tusagassiutinut allagaqarpoq.
Taamaammat KNAPK-mi Siulersuisuunerit Inatsisartunut Naalakkersuisunullu inassutigissavaat, ukiuni tulliuttuni sinerissap qanittuani imaatigut aningaasarsiornikkut inuussutissarsiornerup naapertuutunngorsarnissaanut suliaqartussamik suleqatigiissitamik siunnersuusiortussamik pilersitseqqullugit, susassaqartut akornanniit inuttalersorneqartussamik.