Assartuussineq pillugu isumalioqatigiissitap suliani naammassivaa
Assartuussineq pillugu Isumalioqatigiissitap innersuussutini naammassivai tallimanngorpallu 1. april 2011 tamanut saqqummiutissallugit.
Naluneqanngitsutut Naalakkersuisut Kalaallit Nunaanni angallannikkut attaveqaatit tamarmiusut inuiaqatigiit aningaasaqarnerannit isigalugu misissuiffigineqarnissaat pingaarnertut siunertaralugu 2009-mi decembarimi Assartuussineq pillugu Isumalioqatigiissitaq pilersippaat. Tamatuma kingorna Assartuussineq pillugu Isumalioqatigiissitap suliaq naammassiniarlugu sulinermini aallussilluarsimavoq, maannalu sulinera naammassivoq, taana ineqarnermut, attaveqarnermut angallannermullu naalakkersuisoqarfimmit tusagassiuutitigut nalunaartoqarpoq.
Tamatumunnga atatillugu tallimanngorpat apriilip ulluisa aallaqqaataanni nal. 12.00 Naalakkersuisut tusagassiortunik katersuutsitsisarfimminni tusagassiortut katersuutsinniarpaat, tassanilu Assartuussineq pillugu Isumalioqatigiissitap siulittaasuata Christen Sørensenip Isumalioqatigiissitap isumaliutissiissutaa pingaarnersiorlugu naatsumik saqqummiutissavaa.
Tamatuma kingorna nal. 14-17 Assartuussineq pillugu Isumalioqatigiissitap innersuussutai Ilisimatusarfiup oqalugiartarfiani tamanut ammasumik saqqummiunneqassapput.
Tassunga soqutiginnittut tamarmik Isumalioqatigiissitami siulittaasup Christen Sørensenip Assartuussineq pillugu Isumalioqatigiissitap innersuussutaanik pingaarnernik saqqummiussisoq tusarnaariarsinnaapput. Tamatuma kingorna apeqqutinik itisiliiffiusumik akissuteqarnissamut siulittaasoq piareersimassaaq.
Assartuussineq pillugu Isumalioqatigiissitap isumaliutissiissutaa nittartakkakkut tamanut ammasumik saqqummiunneqassaaq, uani: www.transportkommissionen.gl.
Aallaqqaammulli ilivitsuulluni danskisut saqqummiunneqassaaq, kisiannili kalaallisut nutsernera naammassiniariarpat taanna malinnaatinneqassaaq, tusagasiuutitigut nalunaarummi allassimavoq.