Kalaallit napparsimasut ullut tamaasa kalaaliminertortortassapput

Kalaallinut napparsimasunut, Københavnip eqaani Brønshøjimi Patienthjemmimi najugalinnut kalaaliminersiutissanik ukiumut 400.000 koruuninik immikkoortitsisoqartassaaq, taamatut isumaqaproq Niels Thomsen, Demokraatit sinnerlugit Inatsisartuni politikkikkut oqaaseqartartoq, taassumalu napparsimasut mattattortarnissaat, tuttutortarnissaat qaleralittortarnissaallu kissaatigaa.

- Napparsimasuulluni nuanninngilaq. Pingaartumik Brønshøjimi kalaallit napparsimasut najugaanni Patienthjemmimi, ilaquttanit kilometerinik tusintinik arlalinnit ungasitsigisumi, najugaqarluni. Pissutsit taamaatsillugit politkeritut napparsimasut maqaasisinnaasaannik ikiorserniartariaqarpavut, tusagasisorfinnut nalunaarummi taanna allappoq.

- Demokraatit malugisimavaat Doris Jakobsen (Siumut) siunnersuuteqartoq napparsimasunut kalaaliminersinissamut 200.000 koruuninik immikkoortitsisoqassasoq. Siunnersuut nersugassarujussuuvoq, Niels Thomsen oqarpoq, isumaqarporli aningaasat taakkua naammanngitsut.

- 200.000 koruuninut kalaallit napparsimasut sapaatip akunneranut pingasoriarlutik kalaaliminertorsinnaapaput pingasoriarlutik kiisalu panertuminernik/nikkuminernik sapaatip akunneranut pingasoriarlutik. Demokraatit isumaqarput nunaqqatitsinnut napparsimasunut, katsorsarneqarlutik Danmarkimiittariaqartunut, minnerpaamik iliuuserisinnaagipput ullut tamaasa kalaaliminertorsinnaanerisa isumagin issaa. Taamaattumik kissaatigaarput siunertamut tassunga ukiumut 400.000 koruuninik immikkoortitsisoqartassasoq, Niels Thomsen erseqqissaavoq.

- 400.000 koruuninut napparsimasut ukioq naallugu ullut tamaasa kissartunik kalaaliminertortinneqarsinnaapput, tamannalu neriunartumik kilometerinik tusintinik arlalissuarnik ungasissumiilluni maqaasisanut oqilisiaataasinnaassaaq, Demokraatit politikkikkut oqaaseqartartuat tikkuaavoq.