Ordbogit - maanna aamma mobilikkut
Siorna aggustimi Ilinniusiorfiup Oqaasileriffiullu suleqatigiillutik ordbogit pioreersut »Oqaatsit« aamma »Ordbogen« internet aqqutigalugu atorsinnaalersippaat.
- Maanna Ilinniusiorfiup Oqaasileriffiullu ordbogit taakkua naqitaareersut kalaallisuumiit qallunaatuumut aamma qallunaatuumiit kalaallisuumut mobilikkut Android aqqutigalugu atorsinnaalersippaat. Ippassaq Ilitsoqqussaralugu Oqaatsit Ulluanni februaarip 21-anni 2011 Oqaasileriffiup aaqqissugaanik unnussiuaartitsinermi ilaatigut saqqummiunneqarpoq. Taama Oqaasileriffik aamma Ilinnusiorfik tusagassiorfinnut nalunaaruteqarput.
- Meeqqat inuusuttullu ullumikkut oqarasuaatit angallattakkat pinngitsoorsinnaanngisaasa ilagaat, taamaattumik taakkua soqutigisaat teknologimi atortorissaarutit nutaaliaasut atorlugit, kiisalu nunatta avataanit kalaallisut oqaatsitsinnik soqutiginninnerup annertusiartornera ilutigalugu mobilikkut kalaallisut oqaatsinik pilertortumik ujartuisinnaanissaq ammaanneqarpoq.
Mobilit ordboginik aallersinnaasut Androidimik atuisuusut ilaatigut makkuupput: Sony Ericsson, Samsung, LG, Motorola il. il. Taakkua Android Market (www.android.com) atorlugu imaluunniit Google (www.google.com) aqqutigalugu ‘Ordbogit’ ujarsinnaavaat mobiliminnullu ikkullugu.
Nokiamik iPhonemillu atuisuusut upernariartornerani ordboginik aallersinnaanngorumaarput.