Taekwon-do-mik nunanut allanut unammisartut EM-imi ingerlalluarput

Ullormi siullermiinnaq kuultinnattoqareerpoq, sølvinnattoqarluni aamma bronzit pingasut

Christian Isaksen Tul-imi unammisoq. Assiliisoq: Lauritz Heilmann

Elite Sport Greenland-imi allaffeqarfiup pisortaa, Taekwon-do-millu unammisartoq Lauritz Heilmann nunanut allanut unammisartut EM-imi Tallinnimi Estlandimiittumi peqataanerannik oqaluttuarpoq.

Nunanut allanut unammisartut utoqqartaat Christian Isaksen guldtinnassimavoq femte dan-imi unammersuaareernermi kingorna pissartanngorniutivinnermut anngulluarluni. Tassani Englandimeersoq Paul Caine ajugaaffigaa 4-1-imik nalilerneqarluni.

Saniatigullu aamma sølvinnassimalluni frikampimi 90 kilot ataallugit oqimaassusilinnut.

Angutinnguaq Tittusenip semifinalimi grækeri fjerde tul dan-imi unammivaa, ajorsarluni 2-3-mik nalilerneqartumi, taamaalilluni normu triinngorluni. Taamaasilluni ukioq kingullerminngaannit bronzinnannini attatiinnarpaa.

Lauritz Heilmann naatsorsuutigisamit ingerlalluarpallaarsimanngilaq, kisianni EM-ertussanngorluni tamanna qitimigut ajoqusersimaneranik patsiseqarpoq. Lauritz kuulti illersortussaasimagaluarpaa Tul-imi femte dan's klassimi, siorna Italiami EM-ertoqarnerani pinnattaani. Bronzerlu naammagiinnartariaqarpaa akeratoqarsuani, russeq Arthem Maltslev, unamminerata kingorna.

Steen Rasmussen aamma Tul-imi anden dan-imi ilaalluni bronzinnappoq. Steenip Tul-imi siuariarsimanini takutippaa, semifinalimili Jan Chalouka unammigamiuk ajornartorsiulaalersimalluni.

Pilunnguaq, Sikkerninnguaq aamma Lars ullumi unammipput, aammattaaq angutini iligiit holdit tul-imi. Pitsaassusiat qaffasissimavoq. Unammersuaarnernilu unamminerit sakkortupput, Kalaallit Nunaallu ujamertaarniunnerni unammeqqinngitsoorpoq.

Ulluni tulleriinni pingasuni unammersuaarnerit ingerlanneqartussaapput, Kalaallit Nunaallu timersuutini frikampimi, holdfrikampimi aamma power breaking'imi aamma unammissalluni. Taakkunani timersuutini Kalaallit Nunaat ujaminnanniunnissaanut periarfissagissaarpoq, ullumilu ujamminik katersuiffiulluartup iligiit imminnut tatiginerutilersippai.

Ulloq kalaallit nunanut allanut Taekwon-do'mik unammisartunut pitsaaqaaq.

Ullormi siullermi pingasunngornermi 23. februar illoqarfimmi Tallinnimi EM-ertoqarnerani Kalaallit Nunaata ujammit kuultit, bronzit pingasut timersuummi Tul-imi taavalu frikampimi sølvi pinnattaarai, Lauritz Heilmann paasissutissiivoq.

Powered by Labrador CMS