Kujataa sumiginnagaaqqippoq

- Air Greenlandip iliornera ajorluinnarpoq akuerineqarsinnaanngilluinnarlunilu. Taama sakkortutigisumik oqarpoq Borgmester Simon Simonsen ingerlatseqatigiiffiup billetsinik akitsueqqinnera pillugu. Akit qaffanneqarnerat kujataanik, innuttasuunik, kujataani inuussutissarsiortunik minnerunngitsumillu takornariartitsinermik suliaqartunik assorsuaq eqquivoq.

- Akit qaffanneratigut Kujataani angallanneq keermiaasiit ajorseriartinneqarpoq. Siullermik nunanut allanut aqqut ukioq kaajallallugu ammatinneqarunnaarmat kujataamiut ukiup annersaani Kangerlussuakkoortariaqartalerput. Aqqutit ajornarnerulerput, ilaasut sapernusalerput billetsillu akitsorlutik. Islandimut aqqut neriorsuutaagaluartoq piviusunngunngisaannarpoq maannalu aasaanerani billetsit akikillinissaanik Air Greenlandip neriorsuutigisani unioqqutilluinnaqqissaarpaa, borgmesteri nangippoq.

- Akit qaffaqqinnerat takornariartitsisinut artukkeerujussuarpoq. Angalanerit aaqqissuuteriikkat aqaguinnarluni 40%-inik qaffattartut tuniniarneqarsinnaanngillat. Air Greenlandip siusinnerusukkut nalunaarutai naapertorlugit angalanerup akikinnerulernera aalajangersimasunik amerlassusiliinnik taamaallaat tuniniaanissamut tunngassuteqanngilaq, aasaaneranili akit ataatsimut akikillineqartussaagaluarlutik. Taamaammat iliorneq akuerineqarsinnaanngilluinnarpoq.

- Nunap immikkoortuani najugaqartutut massakkorpiaq iliuuseqartoqarnissaa piumasarisariaqalerparput kiisalu Kujataani angallannerup pitsaasumik akinillu inornanngitsunik akeqartitsilluni aaqqinneqarnissaannik Naalakkersuisut qularnaarinissaat piumasariaqariaqarlutigu, borgmesteri naggasiivoq.