Tasiilami sullissilluarnerusalerneq
Tasiilami tungiuinermut ingerlatsivik Ilaqutariit Illuannut nutserpoq
Nutsernermi sulisut pitsaanerusunik atugaqartinneqalissapput innuttaasullu pitsaanerusumik sullinneqalerlutik.
Februaarip aallaqqaataani 2011 Tasiilami tungiuinermut ingerlatsivimmi atorfillit arfiniliugallartut illoqarfimmi børnehjemmitoqqamut nutserput. Sulisut taakku arfinillit meeqqanik inuusuttuaqqanillu sullissisuupput, ilaqutariinnut siunnersortaallutik imaluunniit inunnut ataasiakkaanut attaveqaataallutik, Kommuneqarfik Sermersooq nittartakkamini taamatut ilisimatitsivoq.
Nutsernerisigut suleqataasut tamarmik immikkut allaffittaartinneqarput. Taamaalilluni atugarisaasigut pitsanngorsaavigineqarput aamma innuttaasunut tuttussaasumik, taakkumi maanna sullissisumik inimi matoqqasumi toqqissisimanartumi oqaloqateqarsinnaalerput. Ilutigitillugu innuttaasut aamma utaqqisarfittaartinneqarput, tassani kaffisorsinnaallutik tiitorsinnaallutilluunniit. Tasiilami kommunip allaffiani maannakkut atuuttumi utaqqisarfeqanngilaq.
Meeqqanut angerlarsimaffitoqaq anngajaajuvoq, iilluatungaanilu allaffeqassaaq ilaqutariinnullu marlunnut-pingasunut inissaqarluni, tassani angajoqqaat ilaatigut angajoqqaatut piukkunnarnersut pillugu nakkutigineqarsinnaalutik.
- Tassani sullissisut peqatigalugit inissisimassapput, taamaalilluta neriuutigaarput attaveqatigiittarnermikkut sullissineq pitsaanerulersissinnaassallutigu sulisunillu atorluaasinnaanerulerluta. Neriuppugut ilaqutariit siulliit qaammammi tullermi Ilaqutariit Illuannut allatsissinnaajumaartut, neriuppugullu aamma innuttaasunik siunissami suleqateqarluarumaartugut, Kurt Rokholm Pedersen, Tasiilami immikkoortortami pisortaaneq, kommuneqarfiup nittartagaa naapertorlugu, taamatut oqarpoq.