Skip to main content

Allakkarisarfik e-mailinik ajornartorsiortinneqarpoq

Allakkerineq pillugu inatsisip nutaap Post Greenland Cyberspacemut ilaatilissavaa

Amerlavugut allakkat assaannarmik allatat qanoq pinissaannik qullisut, piviusorli allarluinnamik oqariartuuteqarpoq: Ukiuni kingullerni allat amerlassusiat appariartuinnaavippoq, tamaatullu ingerlasoqarnera unitsitassaanngitsutut ippoq.

Allakkat Danmarkimiit Kalaallit Nunaannut nassiunneqartut 2001-imi 337 tonsinit 2009-mi 185 tonsinut appariarsimapput - appariaat 46 procentiulluni. Tamatumunnga patsisaasut ilagiulluinnarpaat allakkat elektroniskiusut, e-mailinik taaguutillit aamma allat allakkanut nalinginnaasunut taarsiullugit atorneqartartut. Saammarsaataasinnaanngilaq allakkat amerlassusiisa appariartornerata tamanut atuunnera, tassami aammattaaq danskit aamma savalimmiut allakkeriviinut tamanna atuuppoq.

Inatsisartut ataatsimiinnerminni ullormi siullermi 1. marsi, ineriartorneq tamanna sukkasuumik ingerlasoq tunngavigalugu, allakkerineq pillugu inatsisissaq nutaaq oqaluuserisassavaat - Tele Greenlandip suliffeqarfiutaa Post Greenland pillugu inatsisissaq.

Siunersuummi Post Greenlandip tunngaviusumik suliassai allanngortinneqassanngillat, kisianni inatsisissatut siunnersuummi Post Greenland suliffeqarfinnut allanut assingusunik sullissinernik ingerlatsisunut unammillernerusinnaanera qulakkeerniarneqarpoq, soorlu nassiussisunut sullissinermik aamma poortukkanik nassiussalerinermik ingerlatsisunut.

Inatsisissatut siunnersuummi Post Greenland pisussaaffilerneqassaaq Kalaallit Nunaanni inuiaqatigiit allakkerinermik sullinneqarnissamik pisariaqartitat ingerlatissallugit, kisianni tamatumunnga ilutigitillugu ingerlatsineq niuernermi piumasaqaatit nalinginnaasut tunngavigalugit ingerlatsisoqassaaq. Tassalu ineriartorneq uteqqiattoq ajortoq pilersinneqassaaq: Allakkat ikinnerusut allakkanik nassiussinermi akigitinneqartut qaffatsikkiartuinnassavai, tamatumalu internettimi e-mailinik atuineq annertusiartortissavaa, taamaalilluni allakkanik nassiussisarneq appariartuinnassaaq...

Naalakkersuisut suli allakkerisarfiup allakkanut akigitittagaanik akuersissuteqartartuussaaq.

Postanvisningit atorunnaaneqariartorput

Naalakkersuisut allakkerinermut inatsit nutaaq tunngavigalugu sullissinerit ullutsinnut naleqqukkunnaarsimasut imaluunniit imminnut akilersinnaanngitsut Post Greenlandip sullissinerata iluanit peerneqarnissaat aalajangiiffigisinnaavaat.

Tamakku ilagaat postanvisningit, taakku affaannanngorsimapput 2005-imi 18.084-init 2009-mi 9.106-inut - amerlassusiallu appariartuinnavippoq.

Post Greenlandimit naatsorsuutigineqarpoq postanvisninginit atorunnaarsinneqarpata ukiumut 500.000 koruuninik sipaarutaanissaat, tamatumunnga pissutaavoq nassiussat taakku suliarineqartarnerat assaannarmik ingerlanneqartarnerat.

Tamatumunnga ilutigitillugu Post Greenlandimit naatsorsuutigineqarpoq, tamatumunnga taarsiullugu ajunngitsunik periarfissaqartoq soorlu aningaaserivikkoortitsineq netti aqqutigalugu aningaaserivik, imaluunniit sullissinerit allat allakkerisarfikkut ingerlanneqartartut soorlu allakkanik aamma poortukkaninik tammarnaveeqquserlugit nassiussisinnaanerit.

Nunaqarfinni allakkanit aatsisartut ujartorneqarput

Inatsisissatut siunnersuut kattuffinnut arlalinnut tusarniaassutigineqarput.

Nunaqarfiit peqatigiiffiannit Kanunupemit piumasaqaatigineqarsimavoq allakkerinermut inatsit tunngavigalugu nunqarfiit sapaatit akunnerannut ataasiarlutik allakkanik aamma poortukkanik tikittoqartarnissaat qulakkeerneqassasoq.

Inatsisissatut siunnersuummi Kanunupemit piumasaqaatit akuersaarneqanngillat, tamatumunnga pissutaavoq Post Greenlandip nammineerluni assartuinissamut periarfissaqannginnera, umiarsuilli aamma helikopterit assartuinermut aamma ilaasunik angallassinermut atorneqartartut atortariaqartarmagit.

Kiisalu nunaqarfinnut nassiussanik assartuisarnerit allat aalajangersimasumik akuttussilimmik pisarnerat pissutigalugu, ilaasa sapaatit akunneranut ataasiarnermit ikinnerusunik tikinneqartarmata, Naalakkersuisut Post Greenlandip sapaatit akunnerannut ataatsiarluni nunaqarfinnut allakkisartarnissamik piumasaqaateqarfigineqarnissaa pissusissamisoorsorinngilaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER