Skip to main content

Aqqaluartaa ajugaasumit 2,40 min kungulliulaarpoq

Øystein Slettemark Ruslandimi ujakkaarluni ooqattaasarnermi nunarsuami pissatanngorniunnermi kalaallinit sukkanersaavoq, Aqqaluartaa Olsen ujakkaarnermini pikkugineqarpoq

Kalaallit ujakkaartartut pingasut Øystein Slettemark, Aqqaluartaa Olsen aamma Kristian Kristoffersen ujakkaarluni ooqattaasarnermi nunarsuarmi pissartanngunniunnermi ullumi Ruslandimi Khanty Mansiyskimi peqataapput, Biathlonforbundet tusagassiuutitigut nalunaaruteqarnermini allappoq.

- Marloriarluni ooqattaasarnertalimmik 10 km-inik ujakkaartoqarpoq. Ujakkaarfik ajornakusoortuuvoq ingerlaarfigisat ataatsimoortut isorartuneri pissutigalugit ilungersupilunnissaq nukissallu mianerinissaat pingaaruteqarpoq. Aput aammattaaq assut qinngarnarpoq (issikkami seqummalagami) tamannalu pissutaalluni sisoortaneq assigiinngiiaarpoq, taamaattumik assigiinngissutsit annertujaarput, Øystein Slettemark apuunnerup kingorna oqaluttuarpoq.

Unamminermi ajugaasuuvoq tyskeq Arnd Peiffer, saqeqattaartumik anorlertumi taamaallaat igeriaqattaarnermini ataasiaannarluni uniortoq, tulliuvow franskeq Martin Fourcade kinguleralugu norgemioq Tarjei Bøe.

Angusarineqartut

Kalaallit ujakkaatartut akornanni Øystein Slettemark pitsaanerpaajuvoq. Ujakkaartut sukkanersaanniit taamaallaat 3.02 minutsinik sukkaanneruvoq. Øystenip pallorluni igeriaqattaarnermini ataasiaannarluni uniorpoq, kisianni nikuilluni igeriaqattaarnermini pingasoriarluni uniorluni. Inernerit ataatsimoortinneqarneranni Øystein 102-nngorluni ajugaasumit 4.41 minutsinik kingulliuvoq, peqataasut 125-upput nunanit assigiinngitsunit 40-ninngaanneerlutik, tusagassiuutinut nalunaarummi erserpoq.

Aqqaluartaa Olsen ujakkaarluarnermigut pikkugineqarpoq, sukkanerpaamik taamaallaat 2.40-nik sukkaanneruvoq, tamannalu pitsaasorujussuuvoq. Taamaattorli Aqqaluartaap ujakkaarluarnera anorip saqeqattaarnerata igeriaqattaanerani ajortippaa, tamanna pissutaalluni pallorluni igeriartarnermini sisamariarluni uniorpoq nikorfanerminilu pingasoriarluni uniorluni. Aqqaluartaa 113-inngorluni apuuppoq Øysteinimit 1.12 minutsinik kingulliulluni. Kisianni perngaammik nunarsuarmi pissartanngorniunnermut peqataasumut angusaq ajunngiulluinnarpoq, sulilumi nukarlernut (junior) ilaavoq, Biathlonforbundet tusagassiuutitigut nalunaarummini erseqiissaavoq.

Kristian Kristoffersen nunarsuarmi pissartanngorniunnissap tungaanut nuappoq. Naallu peqqissineraanit sapaatit akunnera ataaseq qaangiutereeraluartoq, ujakkaartarnera pissusissamisuunngilaq. Pallorluni pingasoriarluni uniorpoq nikorfanerminilu ataasiarluni uniorluni, Kristiat 120-nngorluni apuuppoq ajugaasumit 6.45 minutsinit kingulliulluni.

Naammaginanngilaq

- Qangarsuarli ajukkaarluni ooqattaasarnermi unammivunga kiisalu ujakkaarnermi ajunngilluinnartunik aamma pitsaanngilluinnartunik angusaqareerlunga qanoq pitsaatiginera assut nalornivara, apuutereernerup kingorna Øystein Slettemark oqarpoq.

- Ujakkaarfimmi maniilaartumi uanga iluarinerpaajusarinngisanni assoroorniarpallaanngilanga teknikkera pitsanngortikkusuinnarakku. Isumaqarpungalu pilersaarutiga iluatsillugu kisianni misigisimanngilanga ujakkaarsinnaanera tamakkerlugu ingerlallunga pisinnaaneralu suli pissusissaminut inissinnissaa utaqqilaartariaqarunarpara. Igeriaqattaarnermi palloqqallunga ataasiarlunga uniornera uggoraara, taannami uniornivissuummat pingasoriarlunga eqqorluarialugu. Nikorfanermi eqquiniarlunga assut ilungersorpunga tamannalu ilaatiguinnaq iluatsippoq, kisianni nikorfallunga igeriaqattaarninni piffissaq atugara sivisuallaarpoq. Unammineq naammaannarpoq pitsaanerunngilarlumi, Øystein Slettemark nunarsuarmi pissartanngorniunnermi unaminerminik siullermik naliliivoq.

Kisianni nuannerpoq

- Nunarput sinnerlugu unamminermi taamak annertutigisumi nunarsuarmi pissartanngorniunnermi peqataalluni misigisaq nalissaqanngilaq, apuutereernerup kingorna Aqqaluartaa Olsen oqarpoq.

- Unamminermi peqataanera nuannaraara aamma stadionimi misigisaq. Ujakkaarfimmi pappiaqqatigut aatsaat taamak pitsaatigisumik angusaqarunarpunga, kisianni misigisimanera pitsaavallaanngilaq. Ullumi ujakkaarneq nuannerpoq. Igeriaqattaarneq ajorpoq misigisimagaluarpunga aqussinnaalluarlunga, kisianni anori saqisaqattaarnermik naatsorsoruminaakkami. Arfineq marloriarluni uniorneq ajorpallaarpoq, ujakkaartartoq inuusuttunnguaq nassuerpoq.

- Kisiann peqataalluni assorsiuaq nuannerpoq kiisalu nalunagu suli pitsaanerujussuarmi ingerlaarsinnaagaluarluni, Aqqaluartaa Olsen oqarpoq.

- Uanga ullumikkut assut qasuvunga. Kaajallannermi siullermili malugivara susinnaarpiarnanga, Kristian Kristoffersen oqarpoq.

- Pisinnaasara taamaat pinissannut nukissaqanngilanga imaaginnarpoq piginnaasara ajorluinnartoq. Malugisinnaavara sapaatit akunneri marluk napparsimareerlunga suli ajortumik timinniittoqartoq, kisianni ullumi unammereernerup kingorna misigivunga maannakkut unanmminissamut piareersimanerulerlunga. Neriuppunga tulliani unamminissami pitsaanerusumik ingerlassallunga, ajornerusinnaanngilarmi, naliliivoq.

Kristian, Aqqaluartaa aamma Øystein marlunngorpat unammeqqissapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER