Air Icelandimi pisortaq Nuummukarpoq

Air Icelandip timmisartuutaa Dash 8 ajutoorsimasoq maannakkut Nuup mittarfianit peerneqareermat kiisalu mittarfimmi timmisartunut suluusalinnut ammaqqinneqareermat, Islandimiut timmisartuutileqatigiiffiata pisortaa Árni Gunnarsson teknikkerillu Kalaallit Nunaannut tikinnialerput.

- Timmisartumik ajutoorsimasumik assilisat takusavut qanoq annertutigisumik ajoqusersimaneranik takunissinnaanitsinnut naammanngillat. Taamaattumik periarfissaq siulleq atorlugu Nuummut ingerlaassaagut, sapaatiuppaassagunarpoq, Árni Gunnarsson oqarpoq.

Havarikommissionen for Civil Luftfart (Sakkutuujunngitsunik timmisartukkut inunnik angallassinermi ajutoortoqarsimatillugu misissuisartut, nuts.) aammattaaq Københavnimit Nuummut tikissapput. ÁrniGunnarsson tunngavigalugu susoqarsimanera erseqqissumik paasineqanngilaq taamaallaat minnermi timmisartup assakaasoqarfiata talerpilliup isamissimanera, taamaalisoqarnerani timmisartup suluusaa nunamut atuummat timmisartoq kaajallappoq.

Air Icelandip timmisartuutaata Dash 8-100-p assakaasoqarfiata isamissimanera aamma SAS-ip pingasoriarluni Aalborgimi, Viniusimi aamma Københavnimi ajutoorneranut assersuunneqarsinnaanngilaq. SAS-ip timmisartut atugai tassaapput Dash 8-400, taakkulu assakaasoqarfii allatorujussuaq sannaqarput.

- Uagut ilisimanngilarput ajutoornermut suna pissutaasimanersoq. Anorip mittarfik sanimut napillugu sakkortussusia malittarisassanit akuerineqartunit qaangiinngilaq, kiisalu uagut timmisartuutitta mikkiartulernera sioqqutitsiarlugu timmisartoq alla tingivoq, Árni Gunnarsson oqarpoq.

Air Iceland sapaammi Nuummut tikinniarsariniarpoq ingerlatsiviup Dash 8-taata aappa atorlugu ilaasut Reykjavikiliarnissaminnut utaqqisut aallugit. Ataasinngorpat aamma Islandimiut ingerlatsiviat marloriarluni ulikkaavissunik timmisartuussisussaavoq, naatsorsuutigineqarpullu taakku ingerlanneqarnissaat.

- Timmisartuussinissamut pilersaarutivut Dash 8 ataasiinnaq atorlugu naammassiniarsariniarpavut, kisianni ilaasukittarnerup nalaaniikkatta naatsorsuutigaarput tamanna naammassisinnaallutigu. Ajuvissagaluarpat timmisartuuterput Fokker 50 aammattaaq Kalaallit Nunaannut ingerlasinnaavoq, taamaattorli ikinnernik ilaasoqarluni annikinnerusumillu useqarluni, Árni Gunnarsson oqarpoq.

Islandimiup pisortap arfininngornermi ilisimanngilaa Dash 8 ajutoorsimasoq sumut ingerlannneqassanersoq, kisianni suliassaq siulleq tassaavoq timmisartup kranimik peerneqarnissaa mittarfeqarfiup illutaata Air Greenlandillu timmisartunut eqqussisarfiata eqqaannut inissillugu.

Mittarfeqarfiit nalunaarput Islandimiut timmisartuat taassumalu aseqqui peerneqareersimasut, kiisalu mittarfimmit misissuereerneruo kingorna timmisartut angalanerat, tallimanngormat ualikkulli ajutoortoqarmat Nuumminngaannit uninngasimasoq, ingerlaqqissinnaalissasoq.