Skip to main content

Eqqunngitsumik unammillertoqannginnerarpaa

Naalakkersuisut Royal Greenlandip ingerlaneranut akulerunnianngillat

Inatsisartuni ilaasortat Karl Lyberth, Siumut, aamma Knud Fleischer, Kattusseqatigiit Partiiat, Royal Greenlandip Ilulissani Halibut Greenlandimut unammillernermi iliuusai naammaginngilaat.

Taamaattumik aalisarnermut piniarnermullu naalakkersuisumut Ane Hansenimut arlalippassuarnik apeqquteqarput, taannali ilisimatitsivoq naalakkersuisut Royal Greenlandip ingerlatsineranut akuliussinnaanngitsut.

Karl Lyberth apeqquteqarpoq Royal Greenlandip Ilulissani aalisakkeriviutimini qalerallit akiinik namminersortunut inuiaqatigiit aningaasaataat atorlugit unammillernerujussua Naalakkersuisunit pissusissamisoortutut isigineraat.

Tassunga tunngatillugu Ane Hansen akivoq Royal Greenland A/S-i aktienik piginneqatigiiffittut aaqqissuussaavoq, niuertorpalaartumik ingerlatsinera inatsilisiornerup sinaakkutissai naapertorlugit ingerlanneqarluni taamaattumik Naalakkersuisut kissaatiginngilaat ingerlatsiviup Royal Greenlandip ingerlatsinerminni aalajangiussaanut akuliunnissani.

- Akinik aalajangiineq aammalu niuernermi aalajangigassat allat kiisalu periusissanut piginnaatitaaffiit tassaapput piginneqatigiiffimmi aqutsisut akisussaaffiisa ilaat. Suliassat tamakku tassanerpiaq inissinneqarnikuupput ingerlatsiviup tulluunnerpaamik ingerlatsinissaa tunaartaralugu. Politikikkut ingerlatsisuniit allanilu niuernermi piumasaqaatini atugassanilu niuernermi attuumasuni akinik aalajangiinissamik kissaateqartoqartuuppat, ingerlatsivik toqqaannartumik pisortatigoortumik ingerlatsinertut ingerlanneqaraluarpat tulluarnerussagaluarpoq, Ane Hansen erseqqissaavoq.

Aamma Ane Hansen isumaqarpoq tamanna pissutigalugu Royal Greenlandip Ilulissani akinik aalajangiinerminut tunngatillugu inatsisiliorneq atuuttoq unioqqutissimassaneraa Naalakkersuisut taamatut isummernissaminnut tunngavissaqanngillat.

Knud Fleischer Royal Greenlandip akinik aalajangiisarnera aamma ingerlatsinera pillugu arfineq pingasunik apeqquteqarpoq.

Aallarniutigalugu erseqqissaatigineqassaaq Naalakkersuisut isumaqarmata, apeqqutit taamaattut aalajangersimasumillu Royal Greenlandimi akilersuisarnikkut ingerlatsinikkullu iliuutsinut tunngasut Naalakkersuisut oqartussaaffigisaanniinngimmata, taamaattumik Inatsisartut Suleriaasianni § 37 imm. 2 naapertorlugu apeqqutigineqartut akineqarsinnaanngillat.

Ane Hansenili pisumili matumani Royal Greenlandimut saaffiginnissuteqarsimavoq apeqqutigineqartunullu akissutinik qinnuteqarsimalluni.

- Royal Greenlandimut saaffiginninninnut atatillugu nalunaarutigisinnaavara apeqqutigineqartunut 8-inut naammaginartumik aalajangersimasunik akissuteqarnissamut ingerlatseqatigiiffik ikiuussinnaanngimmat.

Royal Greenlandilli nalunaarutigaa ingerlatseqatigiiffiup tamatigut tunitsivimmi inissisimanini illersortuaannarniarmagu aningaasaliissutigineqarsimasut akilersorniarsariniarlugit.

- Taamaasiortoqartarpoq niuernikkut isiginnilluni taamaasilluni ingerlatseqatigiiffiup piffissami sivikitsumi sivisuumilu piuinnarsinnaanera qularnaarneqarluni, Ane Hansen naapertorlugu Royal Greenland akissuteqarpoq, ilaasortanullu inassutigaa apeqqutit taamaattut siunissami ingerlatseqatigiiffimmut najugalimmulluunniit toqqaannartumik apeqqutigineqartassammata Naalakkersuisunuunngitsoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER