Inatsisartut siulittaasuat ataqqinaatsoq

Inatsiartut Kukkunersiuinermut Ataatsimiititaliaani Siumut sinnerlugu ilaasortaq Kristian Jeremiassneq aamma Inatsiartut siulittaasuat Josef Motzfeldt tamanut ammasumik assortuutilerput Kukkunersiuinermut Ataatsimiititaliap inissitsiternissaa pillugu, ataatsimiititaliamut ilaasortat 1. marsi qinigaapput. Ataatsimiititaliaq suli inissitsitinngilaq.

Siullermik Kristian Jeremiassenip naammagittaalliuutigaa siulittaasoqarfiup qanoq iliuuseqarsimannginnera, tamatuma kingunerisaanik Josef Motzfeldtip milluut utertippaa oqarlunilu, Kristian Jeremiassen ataatsimiititaliami sivisunerpaamik ilaasortaasimasutut pisussaaffigigaa inissitsiternissamut ataatsimiigiaqqusinissaq.

Kristian Jeremiassen maannakkut akissuteqaqqippoq isumaqarluni taamak iliorneq siulltaasumut ataqqinaataanngitsoq.

Ulloq 4. marsi 2011 Inatsisartunut ilaasortaq Kristian Jeremiassen Inatsisartut Kukkunersiuinermut ataatsimiititaliamut ilaasortassanik nutaanik toqqaanerup kingorna sulinerup unittoornissaa aarleqqutigeqiguniuk Kukkunersiuinermut Ataatsimiititaliap allattoqarfianut saaffiginnissinnaasoq Inatsisartunut sulittaasup tusagassiutinut nalunaaruteqarluni oqaatigaa.

- Inatsisartunut siulittaasoq tusagassiutinut nalunaarummini naleqqutinngitsumik ataqqinaatsumillu pissusilersortoq isumaqarpunga. Inatsisartunummi siulittaasoq pitsaasoq qanorluunniit pisoqartillugu, tamatigorluinnarlu Inatsisartunut ilaasortat sinniisaattut pitsaasusut pissusilersortussaavoq, Siumup Kukkunersiuinermut Ataatsimiititaliami ilaasortaatitaa Kristian Jeremiassen oqarpoq.

Inatsisartunut siulittaasuuneq nunani siuarsimasuni tamat oqartussaaqataaffianik tunngaveqarluni ingerlatsisuni, qinigaaffiit ataqqinarnersaattut isigineqartarpoq. Taamaattumik Inatsisartunut siulittaasoq tamanit ataqqineqartussaavoq, soorluttaaq siulittaasoq siulittaasuutut atuunnerup malitsigisaanik ataqqinartumik pissusilersortussaasoq; aammattaarlu siulittaasup oqallinnerit pissuserissaartumik ingerlanneqartussaanerat qulakkeertussaavaa, Siumut tusagassiuutitigut nalunaarummi tikkuaavoq.

Ulloq 1. marsi Inatsisartuni ataatsimiinnermi Naalakkersuisooqatigiit Kukkunersiuinermut Ataatsimiititaliamut ilaasortassanik nutaanik toqqaanerisa kinguninngua Siumup Kukkunersiuinermut Ataatsimiititaliami ilaasortaatitaa, Kristian Jeremiassen, ingerlaannaq Inatsisartut Allattoqarfianni Generalsekretærimut saaffiginnilluni Kukkunersuinermut Ataatsimiititaliami inissitsiterluni ataatsimiinnissamut aggersaasoqarnissaa qulakkeerniarlugu saaffiginnippoq. Allattoqarfiup Ataatsimiititaliap inissitsiterluni ataatsimiinnissaanut aggersaanissaq isumagissagaa Generalsekretærip nalunaarpoq, Siumut ilisimatitsivoq.

- Taamaammat ulloq 3. marsi Generalsekretærip neriorsuutigisaatut suli inissitsiterluni ataatimiigiarnissamut aggersaasoqanngimmat, Siulittaasoqarfiup Kukkunersiuinermut Ataatsimiititaliaap inissitsiterluni ataatsimiinissaanut aggersaasoqarnissaa Inatsisartut Siulittaasoqarfianit qulakkeerneqassasoq innersuussutigaara. Toqqaasoqarneratami kinguninngua inissitsiterluni ataatsimiittarneq ileqquummat, Kristian Jeremiassen tusagassiuutitigut nalunaarummi nangippoq.

Inatsisartut siulittaasuat Inatsisartut Allattoqarfiannut qullersaavoq, tassa imaappoq Inatsisartut Allattoqarfianni sulisut tamarmik tassaapput Inatsisartunut ilaasortat tamarmik taamatut atuunneranni ilaasortanut tamanut siunnersuillutillu sullissisuusut.

- Taamaammat isumaqarpunga Inatsisartut siulittaasuat tusagassiutinut nalunaaruteqarnermini naapertuutinngitsumik ataqqinaatsumillu pissusilersortoq. Inatsisartunut siulittaasup Naalakkersuisooqatigiit suleqataattut pissusilersornerusarnera ersarippoq, tamannaluni ajuusaarnaraluartumik akulikippalaamik pisarpoq, taamaammallu kingullermeerluni taamatut pisoqarnera ilimagisinaanngilarput, Kristian Jeremiassen Siumumit tusagassiuutitigut nalunaarummi naliliivoq.