Tuusi siulittaasutsialaavoq

Josef "Tuusi" Motzfeldt Inatsisartutut siulittaasutut pikkorippoq naapertuilluarlunilu, taamaattumik Demokraatini tamakkiisumik tapersersorparput. Siumut kaammattussavarput inuttarsiuinini unitseqqullugu

Justus Hansen: - Naalakkersuisunut illersuinerua malittarisassat atuuttut malikkaanni? Assiliisoq: Leiff Josefsen

Demokraatini isumaqarpugut, Siumut akeqqersimaarluni uppernarsaatissaqanngitsumillu Inatsisartut siulittaasuanik sassussinermigut politikerit qatsunnarsitikkai. Siumup tungaaniit saassussinerit inuttarsiuilluinnaqqissaartuupput, Demokraatit inatsisartuni ilaasortaatitaasa siulittaasuat Justus Hansen tusagassiuutitigut nalunnaaruteqarluni allappoq.

Suliaq massakkorpiaq pineqartoq tassaavoq:

Siumut (ved Kristian Jerimiassen) Inatsisartut Siulittaasoqarfianut (aamma tusagassiutinut) naammagittaalliutigaa Inatsisartut Kukkunersiuinermut Ataatsimiititaliaa toqqarneqaqqammersoq suli inissitsiterluni ataatsimiissimannginnera. Inatsisartut Siulittaasuanit oqaatigineqareersutut, Kristian Jeremiassen, ataatsimiititaliami sivisunerpaamik ilaasortaanikuugami pisussaaffigaa, ataatsimiititaliap aggersarnissaa. Allatut oqaatigalugu kukkuneq Siumumiippoq. Kristian Jeremiassen tamanna tunngavigalugu utoqqatsertariaqaraluarpoq. Taamaaliunngilarli.

Paarlattuanik Siumut qinerpaa, kanngunaannartumik uppernarsaatissaqanngitsumillu Josef Motzfeldtimik saassussinissi, Siumup nammineq kukkussutai matoorniarlugillusooq.

Siumut ilaatigut allappoq, Inatsisartut siulittaasuat tusagassiutinut nalunaaruteqarnermini naleqqutinngitsumik ataqqinaatsumillu pissusilersortoq. Siulittaasormi ilumoortoq sutigut tamatigut inatsisartunut tamarmik siulittaasuattut sinniisaattullu pissusilersortussaavoq. Matumani takunngitsoorneqarsinnaagunanngilaq, illuatungeq sorleq kusananngitsumik ataqqinaatsumillu pissusilersornersoq. Tassaavorlu Siumut. Inatsisartut Siulittaasuata suliassani suliariinnarpaa.

Tamatuma kingorna Siumut inerniliivoq oqarluni Josef Motzfeldt Naalakkersuisut soqutigisaannik illersuisoq.

Apererusunnarpoq, suminngaanneersoruna?

Naalakkersuisunut illersuinerua malittarisassat atuuttut malikkaanni?

Siumup pisuutitsiniarnera tunngavissaqanngilaq, takutitsiinnarporli Siumup qanoq sussaanngitsigisumik oqalliseriaaseqarusunneranut.

Demokraatini uggornartutut isigaarput uppernarsigatsigu, Siumut aporaakkusuinnarluni aporaanniarsarisoq. Taamaattumik Siumut kaammattussavarput siunissami arsaq pisaqqullugu inuttaa pinnagu, Justus Hansen allappoq.

Powered by Labrador CMS