Skip to main content

Nunatsinni eqqartuussisut tamakkiisumik atorfillit

Qaammatit tulliuttut ingerlaneranni sinerissami eqqartuussivinni eqqartuussisut arfineq marluk ataavartumik atorfinitsinneqassapput, taamaalilluni nunatsinni siullermeertumik eqqartuussisunik tamakkiisumik atorfeqartunik sulisoqalerluni.

Januaarip aallaqqaataani 2010-mi nunatsinni eqqartuussiveqarnikkut iluarsaaqqinneq atuutilerpoq. Ullumikkut nunatsinni eqqartuussiveqarnikkut nutaamik aaqqissuussineq ingerlanneqaleruttorpoq. Ukiuni kingullerni marlussunni eqqartuussisussanik, illersuisussanik allatsinillu ilinniartitsisoqarpoq, qaammatinilu tulliuttuni nunatsinni aatsaat siullermeertumik tamakkiisumik atorfeqartussanik eqqartuussisunik arfineq marlunnik atorfinitsitsisoqassaaq.

Nunatsinni eqqartuussivimmi eqqartuussisup Thomas Trier Hansenip ikaarsaariarnermut akisussaasup sinerissami eqqartuussisunngortussat isumalluarfigai. Suliat sukkanerusumik ingerlanneqartalissapput.

- Neriuppunga siunissami eqqartuussivinni suliat sukkanerusumik ingerlanneqartalissasut, maannakkulli eqqartuussiveqarnermut nutaamut ikaarsaariarneq ingerlanneqarpoq.

- Nunani ineriartortitani suliat taamaattut pillugit misilittakkama takutippaat pitsaasumik suliarineqassappat pisariaqartut pingasuusut:

- Qasujaalluni ingerlanneqartariaqarput suliamummi taamaattumut piffissaqartariaqarpoq, naammagittarluni namminerlu iiuuseqaqataalluni. Ikaarsaariarnermi tamakkiisumi pilersaarusiortariaqarpoq, aammalu sulisussat pigineqassapput sulianik tamanik ingerlatsisinnaasut, Thomas Trier Hansen oqarpoq.

Nunatsinni eqqartuussiveqarnermi sulisussat amigatigineqarput.

- Suli uagutsinni inatsisilerituumik kalaallimik sulisoqanngilagut. Kalaallit inatsisilerituut piginnaanilit atorfissaqarteqaagut, Thomas Trier Hansen oqarpoq, qanittukkut Odensemi Københavnimilu kalaallinik inatsisilerituunngornianik neqerooruteqarluni saqqummiisoq.

Nunatsinni eqqartuussiveqarneq ilinniartunut mentoritut aaqqissuussinissamik neqerooruteqarpoq, aasaanerani sulisinnaasunik pissarsiorluni eqqartuussivinnilu praktikkernissamik.

Ukiualuit matuma siorna eqqartuussiveqarnikkut aaqqissuusseqqinnissamut 14 million koruunit missaat aningaasaliissutaapput, taakkulu eqqartuussisunik illersuisunillu ilinniartitsinissamut atorneqartussaapput. Eqqartuussivut qulingiluat siulliit illersuisullu 26-it maannakkut ilinniarsimalerput, sulili naammasisussaqarpoq.

Eqqartuussivinni allatsit ilinniartinneqartuartarsimapput, ukiunili kingullerni ilinniartitsineq aaqqissuussaanerulersimavoq, soorlu aamma sammisani immikkut ittuni sulinissamut ilinniartitsisoqarluni. Tamarmilli ilinniareernerup kingorna tassani suliinnarneq ajorput.

- Inuiaqatigiinni sumi tamani arlallit pitsaanerusumik neqeroorfigineqartarsimapput, nunatsinnilu allatsivut sulisorineqarusuttarput, immaqa pitsaanerusumik akissarsiaqarnissamik neqeroorfigineqarlutik, Thomas Trier Hansen oqarpoq.

Siunissarli qaamavoq. Eqqartuussiveqarnikkut aaqqissuusseqqinnerup pitsaaqqutai nunatsinni innuttaasunut ataasiakkaanut 2014-mi sunniutissapput.

- Naatsorsuutigaara eqqartuussiveqarnikkut aaqqissuusseqqinnerup pitsaaqqutai nunatsinni innuttaasunut ataasiakkaanut 2014-mi sunniutissasut, aaqqissuussaanerusumik sulisoqalissaaq suliassallu malunnaatilimmik ikilisimassallutik, Thomas Trier Hansen oqarpoq.

Ukiut ingerlanerini suliassat eqqartuussivinni amerliartorsimapput, Siorna suliassat katillugit 8.200 missaaniittut tigusimavagut, 4.800 missaat suliarineqarsimallutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER