Sukkornermut niisarnat pissutaapput
2-diabetes nappaatigilernianngikkaanni mingutsitsineq pinngitsoorneqartariaqarpoq. Niisarnanik danskit ilisimatusarnerisa nutaap takutippaat sukkorneq peqqinnanngitsumik inuuneeqarnermik taamaallaat patsiseqanngitsoq.
Niisarnanik danskit ilisimatusarnerisa nutaap takutippaat sukkorneq peqqissuunngitsumik inuuneqarnermik taamaallaat patsiseqanngitsoq - aamma patsisaasinnaapput avatangiisini toqunartut. Taamatut ilisimatitsivoq DR.
Mingutsitsineq patsisaqataalluarpoq 2-diabeteseqalernermut (sukkulernermut), tamannalu siunissami nappaatip tamatuma pinngitsoortinniarnissaanut pingaaruteqarpoq. Taamatut oqaluttuarpoq Syddansk Universitetimi miljømedicin pillugu professor, Phillipe Grandjean:
- Napparsimasup tamanna nammineq pisuussutiginngilaa
- Qangatulli nappaammik tassannga pinngitsoortitsiniaanermi napparsimasoq pisuutinneqartarpoq, pissutigalugu napparsimasoq peqqinnanngitsunik nerisaqartarmat naammattumillu timigissartanngimmat, kisianni tamanna kisimi patsisaanngilaq, tassami aamma mingutsitsineq ilaatigut nammineq pisuussutiginngisamik timitsinniilersartut, Phillipe Grandjean oqarpoq.
Phillipe Grandjeanip Savalimmiuni inunnik misissuisitsineq naammasseqqammerpaa, taakku inuunertik naallugu niisarnatortarsimapput, misissuinerullu takutippaa mingutsitsineq aamma 2-diabeteseqalertarneq imminnut atatigiilluinnartut.