Erngup nukinganik nukissiorfimmik pilersaarut

Siumut sinnerlugu Inatsisartuni ilaasortap Anders Olsenip Naalakkersuisunut apeqqutigaa, sumi qaqugulu erngup nikinganik nukissiorfiliornissamut Naalakkersuisut pilersaaruteqarnersut.

Nukissiorfiit ilisimatitsipput ukiuni tulliuttut marlussunni misissueqqaarnerni Qasigiannguani aamma Aasianni erngup nikinganik nukissiorfiliornissamut qitiunneqarniartut.

- Tamatumani pineqarpoq erngup nukinganik nukissiorfik ataaseq illoqarfinnit taakkunannga marlunnik pilersuisussaq, taakku innaallagissap aqqutaanik attavilerneqassapput. Periarfissaavoq aammattaaq nunaqarfiit Qasigiannguit aamma Aasiaat qanittuiniittut attavilerneqarsinnaanerat, kisianni tamanna aalajangerneqassappat suli imminnut akilersinnaassusermik misissueqqittoqaqqaarallassaaq, Attaveqarnermut Ineqarnermullu Naalakkersuisoq Jens B. Frederiksen ilisimatitsivoq.

- Misissueqqaarnerit pissusissamittut ingerlassappata kiisalu inaarutaasumik aalajangiinissamut tunngavissaq akuersissutigienqarsinnaappat aammattaaq Inatsisartut suliniummut aningaasaliissuteqarpata, taava Qasigiannguanut aamma Aasiannut erngup nukinganik nukissiorfissaq 2014-imi sanallugu aallartinneqarsinnaanera naatsorsuutigineqarpoq, taamak ilisimatitsivoq.

Anders Olsen apeqquteqartportaaq pilersaarummut suut tunngavilersuutaanersut.

- Nukissiorfiit Qasigiannguanik aamma Aasiannik qitiutitsinerannut tunngaviuvoq manna tikillugu misissueqqaarnerit ingerlanneqarsimasut neriunaateqarnerat. Erngup nukinganik nukissiorfiliornissamut neriuunaateqartoqarpoq kiisalu innaallagissamik tunisivissat annertuujullutik. Aalajangiisuussapput sanaartornissamut teknikkimut tunngasunik misissueqqinnissat aamma innaallagissap sakkortuup, illoqarfinnik pilersuinissamut pisariaqartup aqqutissaata sukkoornissaanik misissuinissat, Jens B. Frederiksen akissuteqarpoq.

- Erngup nukinganik nukissiorfissaqqissuni misissueqqaarnernik ingerlatsiffiusussat Nukissiorfiit aamma ASIAP inassuteqaataat tunngavigalugit toqqarneqassapput. Nukissiorfiit aamma ASIAQ (Kalaallit Nunaanni Misissueqqaarnernik Ingerlatsivik) inassuteqaatiminnut tungavigisarpaat ukiorpassuarni paasissutissat katersorneqarsimasut aamma Kalaallit Nunaata sannaanik ilisimasaqarneq, erngup qanoq annertutigisup piuneranik misissuinerit, inaallaagissamik pilersuineq aamma misissueqqaarnerit ingerlanneqarsimasut, paasissutissiivoq.

Jens B. Frederiksen erseqqissarpaattaaq erngup nikinganik nukissiorfiliunnginnerup siornatigut annertuumik sukumiisumillu ukiunili arlalinni misissueqqaarnerit ingerlanneqartartut.

- Misissueqqaarnerit pisariaqartarput erngup nukinganik nukissiorfimmik sanaartornissamut aningaasatuutissat, sanaartorfissami teknikkiumut tunngasut, erngup nukinganik nukissiorfiliorfissap periarfissatut annertussusia, atuisussat aamma suliniutip inuiaqatigiinni aningaasaqarneq eqqarsaatigalugu imminut akilersinnaassusia. Erngup nukinganik nukissiorfiup imminut akilersinnaassusia assorsuaq pingaaruteqarpoq, ilaatigut atuisussat innaallagissamut akiliutigisartagassaat eqqarsaatigalugit, ilisimatitsivoq.

- Misissueqqaarnerit aamma aningaasaqarnermut tunngatillugu misissueqqissaarnerit, taakku tassaasarput inaarutaasumik alajangiinissamut siunnersuutip suliarineqarneranut aamma Naalakkersuisut erngup nukinganik nukissiorfiliornissamut aalajangiinerannut.

- Tamatuma aammattaaq kingunerisarpaa misissueqqaarnerit ilaasa takutittaraat erngup nukinganik nukissiorfiiorfissami periarfissat inuiaqatigiit aningaasaqarniarnerat eqqarsaatigalugu imminut akilersinnaanngitsu, assersuutigalugu nukissiornissamut tungavissatut periarfissaasut naammaginannginnerat imaluunnit erngup nikinganik nukissiorfiliornermi aningaasartuutit qaffasippallaarnissaat. Soorlu tamanna Paamiuni erngup nukinganik nukissiorfissamut tunngatillugu taamaappoq, taamaani misissuinerit paasinarsisippaat nukissiorfissaq imminnut akilersinnaanngitsoq, Jens B. Frederiksen paasissutissiivoq.