Qalipaatit sumut pippat?
Eqqumiitsulianik saqqummersitsivisap ilusissaanik isumassarsisup Bjarke Ingelsip eqqumiigaa Nuummi qasertorsuit takussaanerunerat, tassami takorannernerusinnaagaluarpoq issittullu immikkuularissutaanik ulikaarsinnaagaluarluni
Illussanik titartaasoq akissarsitinneqarsimasoq Bjarke Ingels nunatta eqqumiitsulianik katersugaasivissa nutaaq titartarpaa. Aasaq sulinngiffeqarnermini Nunatsinni angalavoq ilaatigut anguniarnerniarluni aappaatigullu eqqumiitsulianik katersugaasivissap toqqavissaa takussaatigalugu. Tamatumunnga atatillugu Nuuk Ugeavisimit Bjarke Ingels apersorparput, taanna maannakkopiaq illussanik titartaasartut akornanni tusaamaneqarluartut akornanniippoq.
Bjarke Ingels Groupip nunatsinni eqqumiitsulianik katersugaasivissap unammisitsissutigineqarnerani ajugaaneranut tunngatillugu allaaserisaq Nuuk Ugeavisimi naqinneqarsimasoq saqqumiupparput. Allaaserisami tunngaviuvoq illoqarfimmi angalaarneq tamatumani tusarniarlugu illoqarfiit pingaarnersaani illut sannaat qanoq isumaqarfiginerai:
- Blok P ilisarnaataavoq Kalaallit Nunaanni nunatap immikkut illuinnartuusup danskit illuliortartut sorsunnersuup kingulliup kingorna pilersaarusiortarnerisa sumut tamaanga inissiinnarneqarnerannut kiisalu inuit taakkunani najugartussat eqqarsaatiginnguarnagit.
Taamatut naliliivoq Bjarke Ingels, Nuummeeqqarmersoq. Illussanik titartaasartut inunnik 80-inik sulisulik arkitektgruppen BIG pisortaaffigaa. Københavnimi aamma nunani allani malunnaqisunik aamma nersualaarneqaqisunik sanaartukkanut titartaassupput.
Kusanartut, inuppalaartut aamma sorraatsut Bjarke Ingelsip ilusilersuisarnera taamatut oqaatigineqartarpoq. Suliaasa ilagaat VM Bjerget - illut nipitartut sanileriiaat qattuniliami sanaat taakulu saneranni qaqqanik asseqarluni - kiisalu Kinami nunarsuaq tamakkerlugu saqqummersitsinermi danskit saqqummersitsiviat suliara taassuma qeqqaniilluni Den lille Havfrue ilumoortoq.
Ugeavisimit Bjarke Ingels illoqarfiit pingaarnersaanni illunik ilusilersuisimaneq nalilertinniarlugu. Neriuutigigaluarparput illussanik titartaasartut maanimiut peqataanissaat, akerlililaartarniassammassuk. Kisianni qaaqqusat tamarmik qujaannarput.
- Uanga qularinngilara Bjarke Ingels isumaqatigalugu. Ajornartorsiulli uaniippoq Namminersorlutik Oqartussat aamma kommunit nalinginnaasunit allaanerulaartunnguanil sanaartortitsinissaq qunugaat, nassuiaatigineqarpoq.
Bjarke Ingelsili siuarluni iliuuseqarsimavoq, ippassaanik Nuuk qaannamiik isiginnaarsimavaa.
- Tamaanngaannit takuneqarluarsinnaavoq Kalaallit Nunaanni illoqarfiit assorsuaq periarfissagissaarfiugaluartut qaqqat maliinnarlugit sanaartorfissatut aamma inuit najugassaat qaqqat atuarlugit sananeqarsinnaalluaraluarput. Taamatut periarfissaq Nuup avalequtaani atorneqarsimavoq qeqqaniunngitsoq, tamaani 1960'ikkunni nutaaliaasimasut takussaanerupput, Bjarke Ingels naliliivoq.
Tuapannguani nikorfalluni Radiop qaqqaanut isigivoq nuannaajummerlunilu.
- Aserfallassimanerat eqqarsaatigissanngikkaanni takorannertortaqartorujussuuvoq. Igalaavi anginerulaaraluarpata taava tappikani najugaqarluni imaannaassanngilaq qaqqat isiginnaarujoorlugit, Bjarke Ingels isumaqarpoq inissialiallu nutaat isigilerlugit.
- Apeqqutaavoq ilikkagaqartoqarsimanersoq? Qanoq sanaartortarnermut tunngatillugu siuariartortoqarpa? Bjarke Ingels oqarpoq niaqqilu ileqimisaartillugu sanaartukkat kipparissut isiginnaajutigalugit.
Assigiinngissutaat annerpaaq tassaavoq qalipaasersorneqarnerat.
- 1950'ikkuni qaqortumiit qasertumut nuuttoqarsimavoq. Taamak sivikitsigisumik Kalaallit Nunaannillunga ila qalipaasersuutiga atorluartorujussuugaluarpara. Tamanna nunatami qasersoq qaqortumi assigiiaartumilu tulluartorujussuuvoq. Alla eqqaasinnaasa tassatuaavoq Caribiami qeqertat tamaani aamma qalipaatigissaartut atorneqarput, kisianni Kalaallit Nunaannisut annertutiginngilaq. Pinnerpoq - ingammik issittumi illoqarfiunera pissutaalluni, Bjarke Ingels isumaqarpoq.
Isumaa malillugu Kalaallit Nunaanni sanaartornerni issittup qaamarngata aamma silap pissusiata ersersinneqarnissaa atorneqannginnera uggornartoq. Illut tamarmik kippaarissunik isullit silamiinnissamut aamma illoqarfimmiinnissamut kajungilersitsinngillat.
Bjarke Ingelsip siunnersuutigaa sanaartornermi isiginniaatsit allat ilanngunneqarnissaat. Tamakku anorip sammivia nalinginnaanerusoq ataqatigissavaat. Anori illut qaavatigut imaluunniit saneraatigut ingerlaarsinnaavoq, oqquveqarsinnaavoq taamaatumillu silamiikkusussusermik pilersitsilluni tamaaniinnissamut pilerisutsitsilerni.