Air Icelandimik isumaqatigiissuteqarnerup kingunerisai

Inatsisartuni ilaasortaq Kristian Jeremiassenip, Siumut sinnerlugu qinigaasup, maannakkut Naalakkersuisunut apeqquteqaatigaa Air Icelandimut annertuumik atuisutut pisiniartarnermi immikkoortortaqarfiup isumaqatigiissutaa qanoq kinguneqassanersoq.

Kristian Jeremiassenip tamatumunnga tunngatillugu Naalakkersuisunut arlalinnik apeqquteqaateqarpoq:

1. Air Icelandimut isumaqatigiissut Landskarsimut qanoq annertutigisumik aningaasartuutaava?

2. Isumaqatigiissut qanoq sivisutigisumik atuutissava?

3. Isumaqatigiissummi atorfillit nalinginnaasut aamma pineqarpat?

4. Isumaqatigiissutip kingunerisaanik Air Greenlandimi soraarsitsisoqassava aamma tamatuma kingunerisaanik Air Greenlandimut suliassat suliakkiissutaasartut annikillisinneqassappat?

5. Air Greenland aningaasanik qanoq amerlatigisunik isertitassamigut annaasaqassava?

6. Nunatsinni namminermi timmisartornermi akigitinneqartut qaffassappat?

7. Nunatsinnit timmisartornermut akigitinneqartut atorfilittat saniatigut aammattaaq akikillineqarnissaat pilersaarutaava?

8. Isumaqatigiissuteqarnerup kinguneranik aningaasat Nunatsinniit aniasut amerliartuinnarnissaat Naalakkersuisunit eqqasuutigineqannginnerpa?

Tunngavilersuut

Apeqquteqaateqarnermut tunngavilersuutigineqarput Kristian Jeremiassenip paaserusummagu isumaqatigiissuteqarneq inuiaqatigiinnut innuttaasunullu qanoq kinguneqarnissaa.

- Isertuutissanngilara isumaqarama sipaarutaasinnaasunik nassaarniarnermi iluaqusiisoqarsinnaammat, tamannalu pisariaqartuusoq, Kristian Jeremiassen allappoq.

- Sipaarniutit nassaarineqaannassanngillat pilertortumik aamma ajornannginnersiorluni aaqqiinikkut, tamakku siunissaq ungasinnerusoq eqqarsaatigalugu Nunatsinni suliffeqarfinnut aamma sulisartunut aningaasarsiornikkut annikillisaataasinnaammata. Sipaarniutit taamatuttaaq anguneqassanngillat allat ajunngisaarnerat tunngavigiinnarlugu, tamatumalu kingunerisaanik inuiaqatigiinni ataatsimut aningaasaqarneq kinguneqarnerlutsillugu.

Uagut suliffeqarfiutigut aamma sulisartut

- Uanga isumaqarpunga Landskarsip aningaasaqarnera politikkikkut illuinnaasiortumik isiginiarneqarnera inuiaqatigiit ataatsimut aningaasaqarniarnerannut saatsinneqassasoq.

Kristian Jeremiassen isumaqarpoq Kalaallit Nunaat namminersorluni oqartussatut nammineq aningaasaqarnermut ikaarsaariartortoq annertunerujussuarmik qitiutittariaqaraa aningaasat isertitat atukkallu oqimaaqatigiissinneqarnissaasa pitsanngorsarneqarnissaat tamatumalu kingunerisaanik aningaasat nunamut isertinneqartut nunamiillu aniatinneqartut ingerlaarnerat pitsanngorsarneqassasoq.

- Air Icelandimik isumaqatigiissuteqarnerup kingunerissavaa nammineq aningaasaqarnermik ingerlatsiniarnerup ineriartornerata unitsinneqarnera, tamatumalu kingunerisaanik sumiiffinni suliffeqarfiit aamma innuttaasut aningaasartuuteqarnerulernerannik, kiisalu suliffissaaleqinerup annertusineranik, Kristian Jeremiassen annilaangassuteqarpoq.

- Suliffeqarfigut sulisartugullu nunatta aningaasatigut nammineernerulernissaanut atorneqassapput uagut nammineq piumasagut aamma siunertagut malillugit, isumaqarpoq.

Sanngiinnerit eqqorneqarput

Kristian Jeremiassen ilisimatitsivoq Air Greenlandip annaasassamisut minnerpaamik 50 millionit koruunit naatsorsimagai.

- Taamaattumik Air Greenlandip ilimasaarutigaa Air Icelandimik isumaqatigiissuteqarnerup kingunerissagaa nunaqarfinnut aamma avinngarusimanerusunut billitsit akiisa qaffanneqarnissaat. Tamatuma inuuniarnikkut assigiinngissuseq pilersissavaa annertusassallugulu, tamatuma inernerissavaa Demokraatit kissaatigisaata Nunatsinni sumi najugaqalertarnerup allanngortinneqarnissaata piviusunngornera, Siumukkormioq naliliivoq.

- Siumumi tamanna aaqqiineq tulluarsorinngilarput, ajornartorsiup ataaseq aaqqinneqarpoq allamillu pilersitsisoqarluni, oqarpoq nangillunilu:

- Tamatumani taamaallaat pineqarpoq nammineqatigiinnerup allanngortinnera. Nammaqatigiinneq nutaaq inuiaqatigiinni sanngiinnernik eqquisuusoq aamma sanngisuunerusunik salliutitsisoq. Tamanna pivoq Naalakkersuisut nunatta aningaasaqarneranik iluarsiiniarlutik sipaarniartariaqarnermillusooq oqalunniannguarlutik, kisianni tamanna nunatsinni suliffeqarfiit aamma innuttaasut pilliutigalugit ingerlanneqarpoq, Kristian Jeremiassen naqissusiivoq.