Annertusiartortitsineq

Arctic Base Supply, nunatsinni imaani uuliasiortunik sullissivik Nuummi Kalaallit Nunaanniittoq

Steen O. Hansen, Arctic Base Supply'mi pisortanngorpoq. Asseq: RAL

Niuerneq pitsanngorsaniarlugu aamma annertusiartortinniarlugu Arctic Base Supply nutaamik 1. marsi atuutilersussamik pisortartaarpoq, Royal Arctic Linemit tusagassiutitigut nalunaarummi tamanna takuneqarsinnaavoq.

Danskit uuliamik aamma gas-imik piiaanerat aallartimmalli Arctic Base Supply’p piginnittuisa Danbor Service AS-ip aamma Royal Arctic A/S-ip Kalaallit Nunaanni oqartussaasut akuersissutinik amerlanerulersitsinerisa kingunerisaanik uuliasiornermik ingerlatsinerit uuliasiornermik ingerlatsisut annerit aallartitaat qitiutissimavaat.

Taamaattumik Steen O. Hansen, 54, Arctic Base Supply A/S-imi pisortatut toqqarneqarpoq. Steen Hansen ukiuni 25-ni Danbor Servicemi sulisimanerminik tunuliaqutaqarpoq assigiinngitsuni pisortatut atorfeqartarsimalluni, kingullermik suliniummi pisortatut tamatumani akisussaaffigalugit pilersaarusiornermi iliuusissat aamma suliniutit annertusiartortitsinissamik kiisalu niuernermik ineriartortitsinissamik siunertallit. Atorfimmini aallartissaaq 1. marsi 2011.

Steen Hansenip paarlappaa Taitsiannguaq Olsen, Arctic Base Supply-imi pisortatut atorfe-qarsimasoq Royal Arctic Havneservicemi immikkoortortaqarfimmi pisortatut atorfeqarnermi saniatigut. Maannakkut Taitsiannguaq Olsenip Kalaallit Nunaanni umiarsualiviit aalajangersimasut ISO tunngavigalugu akuersissutinik peqalernissaat aallunniarpaa, tamannalumi aammattaaq Arctic Base Supply-mut iluaqutaassaaq. Tamatumunnga ilutigitillugu Taitsiannguaq Olsen Arctic Supply A/S-imi siulersuisuinut ilaasortanngussaaq.

Siulersuisut suliffeqarfiup Arctic Base Supply-p aaqqissuussaanerata taamatut iluarsiiffigineqarnera assut ilimasuffigaat, suliffeqarfimmi Kalaallit Nunaanni uuliasiornermik sullissisuuvoq taamaattumillu uuliasiornermik aamma gas-imik ujarlernermik ingerlatsisut angisuut Kalaallit Nunaanni qillerinissamut pilersaarutinut aallartitaannut atatillugu malunnaatilimmik peqataalluinnartussaasoq.

Steen Hansenip toqqagaaneranut ilutigitillugu Arctic Base Supply A/S-imi siulersuisut allanngortinneqarput, maannakkullu ilaasortat tassaalerlutik: Niels Clemensen, Royal Arctic Line (siulittaasoq), Erik Th. Møller, Royal Arctic Line, Taitsiannguaq Olsen, Royal Arctic Line, aammattaaq Søren Fløe Knudsen, Danbor Service, Steen O. Hansen, Danbor Service aamma Kim Thorøe, Danbor Service.

Suliffeqarfiit tusaamaneqarluartut Danbor Servicep aamma Royal Arctic Linep tunngaviusumik piginnaasaasa ataatsimoortinnerisigut suliffeqarfiup suleqatigiissutigisap Arctic Base Supply-p pilersinneratigut suleqatigiinneq annertooq pilersinneqartoq, maannakkut anguniakkanik Arctic Base Supply-p Kalaallit Nunaanni pilersinneqarneranut tunngavigineqartunik angusaqarnissamut annertuumik ingerlariaqqittoqarpoq, tamanna tusagassiuutitigut nalunaarummi atuarneqarsinnaavoq.

Arctic Base Supply

Suliffeqarfik 2010-p aallartinnerani, imaani uuliasiornermik aamma gassimik ujalernermik suliaqartunik Kalaallit Nunaata eqqaani akuersissummik tunineqarsimasunik, sullissisussatut.

Suliffeqarfiup niuernermini tunngavigisaata aamma attaveqarnerata, atortunik pitsaanerpaanik atortoqarnera aamma periarfissaasut pitsaanerpaat ilanngullugit, pisariaqartinneqartut tunngavigalugit suminngaannilluunniit sulia-qarnissaanut periarfissaqartippaa.

Kalaallit Nunaata imartaani uuliasiorluni aamma gassimik ujarlerluni qillerinerit:

Kalaallit Nunaannit aalajangerneqarpoq pisuussutinik uumaatsunik pisassamaateqarnerup annertusarnissaa, tama-tumunnga ilanngullugit uulia aamma gassi, tamakku suliffissuaqarfiussapput namminneq ingerlasinnaasut tamatumalu kingunerisaanik aningaasaqarnerup ineriartorneranut aamma suliffissanik nutaanik pilersitsiortornermi ajunngitsumik iluaqutaasussanngorlutik.

Kalaallit Nunaanni oqartussaasut suliffeqarfinnut uuliasiornermik ingerlatsisunut aalajangersimasumik amerlassusilinnut qillerinissamut akuersissutit neqeroorutigai, uuliasiornermik ingerlatsisut uuliamik aamma qassimik pissamaatinik ineriartortitsinermut aningaasaleeqataanissaminnut akuersissummik tunineqassapput.

Powered by Labrador CMS