Skip to main content

Sorsunneq asanninnerlu Katuami

Tallimanngornermi Nunani Avannarlernut nunasisut pillugit Henrik Saxgren-ip assilisaasa saqqummersinneranni ammaanersiorneqarpoq

Tallimanngornermi assilisanik saqqummersitsineq soqutiginartoq Katuami Inatsisartunut siulittaasup Josef Motzfeldtip ammarpaa. Assiliisartup Henrik Saxgren-ip Nunanut Avannarlernut nunasisarneq pillugu saqqummersiuppai, saqqummersitani taaguusersimallugu Sorsunneq Asanninnerlu. Assilisat atuakkakkut taama taaguusikkakkut tamakkerlugit naqiterneqarsimapput.

Taaguut atuakkamut atuakkiortup Eduardo Galeano'p atuakkiaanut "Ullut unnuallu asanninnermi sorsunnermilu" Josef Motzfeldtimut eqqaasitsisoq, oqarneratullu: - Galeanop atuakkiamini Latinamerika aasunneqisumik qaaraluttuartutullusooq oqaluttuaraa. Saxgrenip assilisamini oqaluttuarai inuit inuit nunagisaminnit allaaneroqisumi nunassissimasut.

- Suna pillugu inuit tamakku nunagisatik qimassimaneraat assigiinngissitaarput. Saqqummersitsinerulli taaguutaatigut soorlu takuneqarsinnaasoq assilisani takusinnaasatta amerlanerit nunagisartik qimassimavaat sorsunnermik asanninnermilluunniit pissuteqartumik.

- Ilaasa sorsunnerup peqqarniissusia qimarratigisimavaat. Allat inoqammut, inuiannut tikisaminnut nunamulluunniit nutaamut asanninnermit eqqorneqarneq pissutigalugu pissutigisaattut oqaatigisariaqartut. Pissutigineqartut tamarmik inuup eqqissinermik asanninnermillu sorsuunnermut naalliutsitaanermullu taarsiullugit kipisajuarnerannut ilisarnaatit, Josef Motzfeldt oqarpoq.

Josef Motzfeldtip Henrik Saxgren 1987-imi Qaqortup eqqaani Iterlassuarmi Aasiveqarmalli ilisarisimasimavaat. Kingullermik naapipput 2007-imi Qaanaap mittarfiani, Henrik Saxgren Siorapalummiissimasoq Ikuo Oshima tikeraarsimallugu. Elektroingeniør japanimiu, 70'ikkut aallartilaarneranni nuliarilikkaminit Anna-mit, nunamit tikisaminit inooriaatsimillu takornakkaminit uummammigut eqqorneqarsimasoq, Henrik Saxgrenip oqarsimaneratut, Josef Motzfeldtillu oqaluarnermini issuagaatut.

Ikuo Oshima Nunani Avannarlerni innuttanngortunut sinniisaavoq, soorlu Henrik Saxgrenip saqqummersitamini atuakkiaminilu oqaluttuarigai.

Kujasinnerusumi Ilulissani Henrik Saxgrenip aamma naapissimavaa, saqqummersitsinermi ilaasoq, Josef Motzfeldtip aamma eqqaasaa. Tassalu italiamiu Silverio Scivoli.

- Aamma nunataamini nusunneqarsinnaanngitsumik sorlanissimasoq, olivinip orpigai ajornartorsiutiginagit iluliarsuarnik taarsersimavai, Italiami serenadit asanninnilersaarutit kalattuut saqisaanik mitsimaanillu nuannarisaminik taarteqartissimallugit, Josef Motzfedlt oqarpoq.

Itisuumik eqqarsarluni ilassutigaa: - Assiliivimmik assilisaq uisoreriarnernik marlunnik imaqarpoq. Assiliisup assilinneqartullu uisorinerinik taaneqarsinnaasunik. Uisoriunerinnaagaluarlutik qaqugorsuarmut naassaanngitsumut atasussat, eqqaamasatut assitulluunniit.

- Henrik qujanaq, inoqatitta taakku atugaat pillugit ilisimasaqalersikkatsigut, Josef Motzfeldt oqarpoq, saqqummersitsinerlu ammarneqartutut nalunaarutigalugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER