Unnerluussineq eqqarsajallannarpoq

Kuupik Kleistip CIAp timmisartuussisarnerinut misissuinermut tunngatillugu danskit nunanut allannut ministeriat aamma statsministeri sapaatit akunneranni aggersumi oqaloqatiginiarpai

Naalakkersuisut Siulittaasuata Kuupik Kleistip maannakkut qitiutilerpaa, CIAp Kalaallit Nunaat aqqusaarlugu timmisartuussisarsimanerinik tamanut ammasumik misissuineq assortuussutaasimanersoq. Assiliisoq: Leiff Josefsen

- Uanga pappiaqqat oqaaseqarfiginninnerini atuaqqaarusuppakka. Kisianni assut eqqarsajallannarpoq taamaattumik tamanna sapaatit akunneranni aggersumi nunanut allanut ministeri Lene Espersen aamma statsminister Lars Løkke Rasmussen naapikkukkit saqqummiutissavara. Pisoq iternga tikillugu ilisimasaqarfiginnginnakku taava qanoq annertutiginera isummerfigiuminaatsippara, Naalakkersuisut Siulittaasuat Kuupik Kleist, oqarpoq. Pappiaqqat Wikileaksimeersut danskit naalakkersuisuisa CIAp danskit, kalaallit aamma savalimmiut silaannartai aqqusaarlugit timmisartuussisarsimaneqarnerannik sukumiisumik 2008-mi misissuisimannginnerat qulaajareermassuk.

Pasinnittoqarpoq timmisartuussinerit tassaasimasut tigusarisimasanik isertortumik angallassisarnerit ilagigaat, tamatumani ajortumeeriniatut pasissat inatsisinik unioqqutitsilluni CIA-mit europamiit qimarngunneqartarlutik. Europarådimit aamma Europaparlamentimit timmisartut 35-t pasineqarput CIAp isertortumik tigusanik angallassisarneranut attuumassuteqartutut. Kalaallit Nunaanni Mittarfeqarfiit timmisartunik nalunaarsuisarnerisa takutippaat timmisartunit pasineqartunit 35-usunit pingajussaat Kalaallit Nunaannut nunnittarsimasut. Tamakkununnga ilaallutik timmisartut CIAp timmisartuutiteqatigiiffianeersut ”Stevens Express Leasing” isertorniarnermut atortagaanersut.

Danskit naalakkersuisuisa misissuineq maannakkut isornartorsiorneqartoq DR-ip piviusutut aallakaatitassiaa ”CIAp danskinik attaveqarnera” tunngavigalugu, taamanikkut nunanut allanut tunngasunut naalakkersuisuusoq, Josef Motzfeldt erseqqissaavoq, ”timmisartuussisarnermut aamma inuit pisinnaatitaaffianut tunngatillugu isumaqatigiissutit unioqqutinneqarsimappata” tamanna Naalakkersuisut akuerisinnaanngikkaat.

- Uagut naatsorsuutigaarput danskit naalakkersuisuisa amerikamiunut isuma taanna erseqqissaatigissagaaat. Uagut aamma akuerisinnaanngilarput Kalaallit Nunaat ingerlatsinernut, nalinginnaasumik inuit pisinnaatitaaffiinik atorunnaarsitsisimanermik ilaqartunik, akunniffigisartakkatut atorneqarnissaa, aviisumut ullormut saqqummersartumut Informationimut Josef Motzfeldt 2007-mi oqarpoq.

Danskit marloqiusamik iliortarsimanerisa qulaarneqarnerisa kingunerisaanik SF piumasaqaateqarpoq arlaannaannulluunniit attuumassuteqanngitsumik misissuisoqarnissaanik, tassani atorfilittat ilisimannittutut akisussaassuseqartinneqarlutik killisiorneqassapput. Imaanngitsoq partii isumaqarmat CIAp timmisartuussisarneri pillugu annertunerusumik saqqummiussisoqarnissaanik, kisianni tamatumunnga atatillugu Danmarkip qanoq iliuuseqarsimanera qulaajarniarlugu.

Kuupik Kleistip maannakkorpiaq oqaatigisinnaanngilaa siunnersuut tamanna tapersersornerlugu imaluunniit tapersersunnginnerlugu.

- Uanga pisoq sukumiinerusumik misissortariaqarpara apeqqummut tamatumunnga isummertinnanga, Kuupik Kleist oqarpoq, Folketingimut ilaasortaanermi nalaani CIAp timmisartuussisarneri pillugu isornartorsiuilluni saqqummiussisarsimasoq.

Powered by Labrador CMS