Skip to main content

Ilumoortoq nipangiutiinnarneqarpoq

Pappiaqqat isertukkat Wiki-leaksimit saqqummiunneqartut kinguneqartinneqatariaqarput arlaannaanulluunnit attuumassuteqanngitsumik misissuisitsinermik, kalaallit folketingimi ilaasortat taamak isumaqarput.

Kalaallit folketinngimi ilaasortaasut - Juliane Henningsen (IA) aamma Lars-Emil Johansen (Siumut) Folketingimi illuatungiliuttunut tapersiipput, taakkuninnga arlaannaannulluunniit attuumassuteqanngitsumik misissuisoqarnissaa CIAp kalaalit, savalimmiut aamma danskit silaannartaat aqqusaarlugit isertortumik timmisartuusisarsimanerannut tunngatillugu.

Taamatut pisoqarpoq Wikileaksip pappiaqqat isertukkat aallartitaqarfiup paasissutissiissutai USAp Danmarkimi ambassadørerisimasaanit James P. Cainimeersut. Pappiaqqani erserpoq danskit naalakkersuisuisa – Cain tunngavigalugu – CIAp timmisartuussisarsorineqarneri pillugit sukumiisumik misissuisoqarnissaa kissaatiginngikkaat – ajortumeeriiniatut pasisanik europami tigusarisimasanik isertortumik timmisartuusinerpassuit nunanut allanut, inuit piginnaatitaaffiinik pingaartitsiffiuallaanngitsunut, paarnaarussivinnut assartuinerit.

- Pappiaqqat atuarakkti uanga tupaallallungalu mamiatsappunga, Juliane Henningsen oqarpoq.

- Oqarusunnarpoq uagut ilumoortuaannarsimavugut. Taamani Folketingimi naalakkersuisut isumaqaqatigiinniaratsigit arlaannaannulluunniit attuumassuteqanngitsumik misissuisitsisoqassanersoq pillugu, taamatut kissaateqarneq itigartinneqarluinnarpoq. Naalakkersuisut isumaqarput namminneq taamatut misissuineq ingerlassinnaallugu. Uanga misigisimavunga Danmarkip taamaaliornermigut CIAp timmisartuussisarneri pillugit piviusut nipangiussimaannarlugit soqutigineerutsinniaraat. Maannakkut paasinarsivoq ilumut qoqassinneqarsimasugut. Tatiginninnermut tamanna assorsuaq ajoqutaavoq, taamaattumik arlaannaannulluunniit attuumassuteqanngitsumik misissuititsisariaqarpugut. Naalakkersuisut qanorluunniit imminnut misissuiffigisinnaanngillat, Juliane Henningsen oqarpoq, isumaqarporlu Danskit naalakkersuisuisa Kalaallit Nunaannut tunngatillugu tatiginassusiat annertuumik annikilleriartoq.

Lars-Emil Johansen taamatuttaaq naalakkersuisut pakatsiffigivai.

- Kalaallit-danskit oqaluttuarisaaneranni nipangiutiinnakkat saqqummertarnerat nangeqattaartunngorsimavoq. Tamanna aallartippoq statsiminister H. C. Hansenip aallagaatigut isertuussatigut, taamani 1950-ikkunni USA akuerivaa Kalaallit Nunaanni qaartartunik atomitalinnik uninngatitsisinnaasoq. CIAp timmisartuussisarneri uanga 2005-imili sammisarivakka, taamani siullerpaamik tusarakkilli. Taamaattumik soorunami apeqqarissaarluni oqalinnissaq aamma arlaannaannulluunniit attuumassuteqanngitsumik misissuititsinissaq tapersersorpakka, Lars-Emil Johansen oqarpoq, isumaqarporlu pisimasut pisariaqalerseqqikkaat Kalaallit Nunaata nunanut allanut aamma sillimaniarnermut politikkimut annertunerusumik sunniuteqalernissaa, Kalaallit Nunaannut tunngasut eqqarsaatigalugit.

- Pisimasoq CIAp timmisartuusisarneranut tunngasut kiisalu danskit naalakkersuisuisa naammaginanngitsumik misissuisimanerat eqqarsalersitsivoq. Kalaallit Nunaannit piumasarineqartariaqarpoq nunanut allanut- aamma sillimaniarnermut politikkimut tunngatillugu annertunerusumik akisussaaffeqalernissaq. Taamatut ingerlaannartoqarsinnaanngilaq. Pissutsit ullutsinnut naleqqutinngillat, Lars-Emil Johansen oqarpoq, isumaqarporlu suli Danmarki suleqatigineqartariaqartoq, kisianni kalaallit tungaanniit nunanut allannut- aamma sillimaniarnermut tunngatillugu annertunerusumik sunniuteqartoqalerluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER