Løkke aamma Lene E. CIA pillugu nassuiaassapput

Udenrigspolitisk Nævn (nunanut allanut politikki pillugu ataatsimiititaliaq) CIAp tigusanik danskit oqartussaaffii aqqutigalugit timmisartuussisarsorineqarnera pillugu piaarnerpaamik ataatsimiigiaqquneqassaaq.

Assiliisoq: Ole G. Jensen

Naalakkersuisut nuimanersaat nunanut allanut politikki pillugu ataatsimiititaliamut piaartumik ataatsimiigiaqquneqartumut marloqiusamik iliorsimasorineqarnertik pillugu nalunaajaasinneqassapput, tamatumani pineqarpoq CIAp unioqqutitsilluni tigusanik danskit oqartussaaffii aqqusaarlugit timmisartuussisarsorisimaneqarnera.

Pappiaqap ataatsip Wikileaksimeersup isumaqarnarsisippaa danskit naalakkersuisui marlunnik oqaqarlutik oqalussimasut, tamanut saqqummiussami pisisimasut pillugit USA-mit akissuteqartoqarnissaa piumarigamikku. Piumasaqaat pimoorunneqarpallaanngitsoq atorfillit nuimasut taaamani amerikamiut ambassadøriannut James Cainimut oqaluttuarput.

Ambassadørip nalunaarutaanit tamanna erserpoq Wikileaksimi nettikkut saqqummiussisartut qulaagaanni

Socialdemokraterne, SF aamma De Radikale nunanut allanut politikki pillugu ataatsimiititaliap piaarnerpaammik ataatsimiigiaqquneqarnissaa piumasaraat, naalakkersuisut pilersaarutit malillugit 1. februaari ataatsimiinnissami naalakkersuisut nassuiaateqarnissaat utaqqeqqaarnagu. Partiit pingasut ataatsimiititaliamik piaarnerpaamik ataatsimiititsisinnaapput

Siornatigut nunanut allanut ministeriusimasup Mogens Lykketoftip, maannakkut socialdemokratit ataatsimiititaliami siulittaasumut tulliutitaata, piumasaaqaatigaa statsminister Lars Løkke Rasmussen (V) aamma udenrigsminister Lene Espersen (K) tamarmik nassuiaateqassasut.

- Tamatigut ilungersunartuusarpoq naalakkersuisut Folketingimut kukkusunik paasissutissiigaangata, Lykketoft oqarpoq.

Tamatumunnga ilutigitillugu Mogens Lykketoftip ilimasaarutigaa, CIAp timmisartuinut tunngasoq naalakkersuisut talerpilliuniat USA-mit suleqateqarnerannik annertunerusumik misissuinissamut ilanngunneqarumaartut, tamannalu pissasoq Socialdemokratit naalakkersuisuutitaqalissappata. Ilisimannittut ilisimannittutut akisussaassuseqartinneqarlutik killisiorneqassapput, piumasaqaateqarpoq.

SF-imeersup Holger K. Nielsenip tikkuarpaa pisoq taamak ilungersunartigisoq nunat akornanni innuttaasut pigiinnaatitaaffii naalagaaffiillu pisussaaffii unioqqutinneqarsimammata, danskit oqartussaaffii tigusanik angallassinermut atorneqarsimappat, soorlu DR-imi aallakaatitassiami tamanna ilimanarsisoq. Tamanna Kalaallit Nunaanni aamma Kastrupimiugunartoq pisimasorineqarpoq.

Nunanut allanut ministeriusimasoq Per Stig Møller (K) aalajangersimalluinnartumik ilumuunnginnerarpaa nammineq marloqiusumik iliorsimanini. Statsminiter Lars Løkke Rasmussenip pappiara James Cainimeersoq isertugaq tamanut saqqummiunneqartoq oqaaseqarfigerusunngilaa.

Powered by Labrador CMS