Timmisartuni inuttat oqaaseqaateqarput

Kalaallit Nunaanni Timmisartut Inuttaasa Peqatigiiffiata aamma Air Greenland Cabin Unionip pisoq ajuusaarutigaat, innuttaasunik aammattaaq Kalaallit Nunaannut tamaanngaannillu angalasunik eqquisoq

Timmisartuni inuttat mattussineq ajuusaarutigaat misigisimallutillu innuttaasut tamatunani pisortaminnit tiguarneqartut. Assiliisoq: Leiff Josefsen

Kalaallit Nunaanni Timmisartut Inuttaasa Peqatigiiffiat, FFG aamma Air Greenland Cabin Unionip, ACU nipangersimajunnaarlutik tusagassiuutitigut oqaluttuarput nassuiaallutillu, sooq Air Greenland timmisartortartunik aamma timmisartuni saqisunik mattussisimanersoq pillugu.

"Timmisartuni saqisut 2009-mi nutaamik isumaqatigiissuteqarput aatsaallu 2012-mi naasussaavoq. Timmisartortartut isumaqatigiisutaat 31. decembari 2010 naavoq. Taannalu suliffimmi aaqqiagiinngissuteqarnermut pissutaavoq.

Airgreenlandip suliffeqarfiup timmisartuni sulisuinit mattussinermigut Kalaallit Nunaanni innuttaasut sallunaveeqqutitut tigusarai, naak isumaqatigiissut nutaanngortinneqartussaq taamaallaat timmisartortartuinnarnut tunngassuteqaraluartoq. Isumaqatigiinniarnerpassuit atorneqaraluartut kingullermi Isumaqatigiissaaniartarfimmi Københavnimi 8. januar 2011, timmisartortartut suli Air Greenlandimik isumaqatigiissuteqarnissartik iluatsinngilaat. Isumaqatigiissitsiniartartup illuatungeriit isumaqatigiisinnissaat unitsiinnarpaa. Timmisartortartut aamma timmisartuni saqisut Serviceforbundimut ilaasortaapput.

Kalaallit Nunaanni Timmisartut Inuttaasa Peqatigiiffiata aamma Air Greenland Cabin Unionip pisoq ajuusaarutigaat, innuttaasunik aammattaaq Kalaallit Nunaannut tamaanngaannillu angalasunik eqquisoq. Timmisartortartut aamma timmisartuni saqisut pisoq ilungersunartutut isigaat, tamatumunngalu sulisitsisoq kisimi akisussaavoq.

Timmisartortartut isumaqatigiissutaata nutarterneqarneranut atatillugu Airgreenlandip piumasaqaatigai allannguutissat annertoorujussuit, naak timmisartortartut annertuunik akuersissuteqareeraluartut Airgreenland naammaginnilersinnaasimanngilaq tulleriiaaginnartumillu pinngitsuugassaanngitsunik piumaqaqattaarpoq. Kingullermik Airgreenlandip isumaqatigiissaaniartarfimmi isumaqatigiinniarnerit ingerlariaqqissinnaajunnaarteqqippai tamannalu tunngavigalugu isumaqatigiissitsisinnaaneq aamma mattussinerup atuutilernissaata kinguartinnissaa tunngavissaqarsimanatik.

Air Greenlandimi kikkunut tamanut saqqummiussinermini ersersinniarpaa timmisartortartut nukatsitaasut.

Timmisartortartut aningaasarsiaat qaffasipput kisianni imatorsuaq pinnatik. Isumaqatigiissummi tunngavigineqarput ukiut sulisimanerit tunngavigalugit qaffakkiartortarneq, anigaasarsiallu qaffasinnerpaaffiat 1,2 millionit koruuniupput, soraarnerussutisiassat ilanngunnagit tamanna angussagaanni ukiuni 31 sulereersimasariaqarpoq.

Aigreenlandimi timmisartortartunit 1074-iusunit sisamat ukit 31-t sulereersimanertik pissutigalugu anigaasarsiat qaffasinnerpaaffianiipput.

Air Greenlandip aammattaaq timmisartortartut piffissaq suliffigisartagaat ilannguppaa, tamatumunngalu tunngatillugu saqqummiullugu timmisartortartut ukiumut nalunaaquttap akunnerini 800-niit 1.200-nut sulisartut. Kisianni sulisitsisut tamatumunnga atatillugu ilanngutinngitsoorpaat timmisartortartut piareersimasuusarnerat kiisalu eqaatsumik sulisarnerat, ullumikkut timmisartortartut ulluinnarni sulinerminni taamatut suleriaaseqarput taamaaliortarnerisalu ullut ajunngitsumik ingerlatittarpaat kiisalu timmisartornissat ingerlanneqartarlutik.

Nalunaaquttap akunneri taakku 800/1200 eqqunngilluinnarput, pissutsimmi imaapput: timmisartortartut 60 procentii sapaatit akunneranut nalunaaquttap akunnerini 60-ini Airgreenlandimut piareersimasuusarput, Airgreenlandilli tamatiguunngitsoq pilersaarusiornermini timmisartortartut nalunaaquttap akunnerini 60-ini, taakku inatsisit malillugit qaffasinnerpaaffiupput, piareersimasarnerat pilersaarusiunngitsooraangagu allarluinnaavoq tamannalu timmisartortartut sunniuteqarfigisinnaanngilluinnarpaat. Timmisartortartut 40 procentii eqqarsaatigalugu taakku sapaatit akunneranut qassasinnerpaamik nalunaaquttap akunneri 50-it pineqarput, tamatumunngalu tunngatillugu timmisartortartut aammattaaq isumaqatigiinniarusussusermik takutitsisimapput, kisiannili Airgreenlandip isumaqatigiinniartuisa pisortaannit akueriumaneqanngilluinnarsimallutik.

Air Greenlandimi pisortap Michael Binzerip mattussinermut atatillugu oqaatigaa timmisartortartut oqartussaaqataanerat annertuallaartoq. Michael Bizerip tamanna killilerniarpaa. Airgreenlandip isumaqatigiinniarnernut maannkkut unittooqqasunut atatillugu piumasarisimavaa timmisartortartut oqartussaaqataanerat allanngortinneqassasoq tusarniaaffigisassanngorlugit. Tamanna siusinnerusukkut Airgreenlandimut ajornartorsiutaasimanngilaq timmisartortartullu isumaqarput tamanna isumaqatigiissutit tunngavigalugit pisinnaatitaaffimminnit aamma periarfissaminnit killilersuinerusoq.

Air Greenlandip pisortaa Michael Binzer issuarneqarpoq oqarsimasoq: “Maannakkut timmisartortartut akuersiinnartariaqarput”. Tunngaviusumik tamannarpiaq pineqannginnerluni. Oqaaseqarnerup tamatuma erseqqissumik takutippaa suliffeqarfiup piumasaqaatai tassaaginnangitsut aningaasartuutinik annikillisaaniarneq. Tamanna sulisartut kattuffiinut akiuuneruvoq, akiuunnermi anguniarneqarluni sulisartut kattuffiisa sunniuteqarnerat aamma pisinnaatitaaffii annikillisarniarneqarput.

Timmisartortartut tungaanniit erseqqilluinnartumik oqaatigissavarput Michael Binzerip nassuiaanera aamma timmisartortartut atorfeqarnerminni atugarisaannik aammattaaq aningaasarsiat pillugit eqqunngitsunik saqqummiussuinera sakkortuumik akerlileratsigu. Air Greenlandimi aningaasarsiat uagut unammillertitsinnut sanilliussilluta ullumikkut unammillersinnaareerput. Tamatumunnga akerliliisumik Air Greenland kisitsisinik saqqummiussaqanngilaq. Tusagassiuutit aqqutigalugit aammattaaq innuttaasunik akerliutitsiniarsarineq nammineq tunngavissaarussimaneq pissutigalugu atorneqaraluartoq, timmisartortartut isumartik allanngortinnavianngilaat tassaasoq isumaqatigiinniarnerit isumaqatigiinniarfimmi ingerlanneqassapput allamiunngitsoq.

Erseqqilluinnarpoq timmisartortartut aamma timmisartuni saqisut Airgreenlandimit maannakkut aamma siunissami ataatsimoorfeqarnerat, piffissami kingullermi sivisujaartumi periaatsit aqutsinermi atorneqartut eqqarsaatigeqaavut isumakuluutigalugillu.”

Powered by Labrador CMS