Norgemi Nunatsinnilu aatsitassanut oqartussat suleqatigiilersut

Isumaqatigiissut nutaaq Aatsitassanut Pisortaqarfiup pisortaanit Jørn Skov Nielsenimit norskillu Oljedirektoratip pisortaanit Bente Nylandimit atsiorneqarpoq

Kuupik Kleist aamma Ove Karl Berthelsenip Norgemut pisortatigoortumik tikeraarnerat aatsitassat pillugit Kalaallit Nunaata aamma Norgep akornanni suleqatigiinnerulernissamik kinguneqarpoq. Foto: Privat

Nunatsinni Aatsitassanut Pisortaqarfik aamma Norge-mi Oljedirektoratet ikummatissat pillugit suleqatigiinnerup annertusarnissaa pillugu isumaqatigiissuteqarput. Tamanna pivoq sapaatit akunnerata ingernanerani Naalakkersuisut siulittaasuat Kuupik Kleist aamma Inuussutissarsiornermut Aatsitassanullu Naalakkersuisoq Ove Karl Berthelsen pisortatigoortumik Norgemut tikeraarmata. Isumaqatigiissummik aatsiortuupput Aatsitassanut Pisortaqarfiup pisortaa Jørn Skov Nielsen norskillu Oljedirektoratiata pisortaa Bente Nyland.

Isumaqatigiissummi siunertaapput imminnut attuumassuteqarfiit siuarsarnissaat, nukittorsarnissaat inerisarnissaallu kiisalu aatsitassanik piiaanermi aqutsinermilu misilittakkanik paarlaatseqatigiittarnissaq. Norgemi Nunatsinnilu aatsitassanut oqartussat ikummatissanik isumannaatsumik piujuartussamillu ineriartortinnissaa siunertaralugu.

Suleqatigiissutissat aalajangersimasut tassaasinnaapput ikimmatissanik sammisaqarnermi pissutsit attuumassuteqartut, soorlu malittarisassat, naleqqussaariaatsit ingerlaatsillu, maleruagassat, periutsit aamma ingerlatsinerit.

Suleqatigiissutissaq pingaartoq alla tassaavoq oqartussaqarfinni atorfillit makkunatiut ilisimasaat piginnaasaallu nukittorsarnissaat inerisarnissaallu pillugit pilersaarutit; naleqqussaanerit, allaffissornikkut aqutsinerit, aamma ikummatissatigut pisuussutit aqunnissaat nakkutiginissaallu.

- Norgemi tikeraarnerup erseqqissaatigaa Kalaallit Nunaat aamma Norge sammisaqarfinni arlalinni unammilligassaqartut periarfissaqartullu imminnut nallersuussinnaasunik. Isumaqatigiissut manna aqqutigalugu suleqatigiinnissamik isumaqatigiissut manna aqqutigalugu Norgep nunap uuliatigut gas-imillu ukiorpassuarni piujuartumik atorluarnissaasa qulakkeernissaanni misilittagai ilinniarfissatut periarfissat nukittorsarneqarnissaat nuannaarutigisorujussuuara, Inuussutissarsiornermut Aatsitassanullu Naalakkersuisoq Ove Karl Berthelsen oqarpoq.

Powered by Labrador CMS