KIK Landskarsimit tapiissutisisinnaanngilaq
Inatsisartuni ilaasortap Doris Jakobsenip Naalakkersuisunut apeqquteqaatigaa ilinniagaqartut kattuffiat KIK meeqqat inuusuttullu kattuffiinut aningaasanik immikkoortinneqarsimasunik tapissutisisinnaanersoq
Ullumikkut Nuna tamakkerlugu meeqqat inuusuttullu suliniaqatigiiffinut tapiissutit Aningaasaqarnermut Inatsimmiittut aqqutigalugu tapiissutisisartut tassaapput Sorlak, Sukorseq aamma Kalaallit Nunaanni Spejderit. Maannakkut Inatsisartuni ilaasortap Doris Jakobsenip, Siumut, aammataaq kissaatigilerpaa ilinniagaqartut kattuffiata KIK-ip kontomit tassanngaanniit tapiiffigineqartalernissaa.
Taamaattumik Nalakkersuisunut apeqquteqaatigaa eqqarsaatigineqarsinnaanersoq meeqqat inuusuttullu suliaqatigiiffii taaneqareersut avataaniittut taamatut tapiffigineqarnissaminnik periarfissaqarnersut.
- KIK'p maleruagassaanni erserpoq kattuffiup siunertarigaa ilinniagaqartut soqutigisaat sulissutigissallugit tassalu imaappoq ilaasortaasut soqutigisaat. Tamanna tunngavigalugu KIK tapiissutinik pissarsiaqarnissamut piumasaqaataasut avataaniippoq, Mimi Karlsen naliliivoq.
Taamaattorli erseqqissaatigaa KIK ingerlatsinerminut suliniutinullu tapiiffigineqarnissaminut periarfissaqarluartoq Tipserluni Lottorlunilu iluanaarutinik agguaassinermi pulje B-mut qinnuteqarsinnaalluartut, taamatuttaaq KIK'p Sorlammut ilaasortaanini tunngavigalugu pulje B-mi agguaasseriaatsimut sunniuteqarsinnaasoq.
Tamatuma saniatigut Mimi Karlsen allappoq Aningaasaqarnermi Inatsisikkut meeqqanut inuusuttunullu suliniaqatigiiffinut tapiissutigineqartartut tunniuneqartartut Kulturikkut ingerlatsineq sunngiffimmilu sammasaqartitsineq pillugit Inatsisartut peqqussutaat innersuussutigalugu. Ukioq manna aningaasaqarfiusumi taaneqareersutut pineqarput Sorlaq, Sukorseq aamma Spejderit Kattuffiat tapiissuteqarfigineqartussaapput.
- Meeqqanut inuusuttunullu suliniaqatigiiffiit allat peqqussutip § 21-mi allassimasunik naammassinnissinnaasut aammattaaq tapiissuteqarfigineqarsinnaapput, Mimi Karlsen erseqqissaavoq.
Paragraf 21-p oqaasertai imaapput: "Meeqqat inuusutullu suliniaqatigiiffii tassaapput suliniaqatigiiffiit aaqqissuussinernik meeqqanut inuusuttunullu 30-t inorlugit ukiulinnut ingerlatsisut." Taamaattumik piumasaqaataavoq suliniaqatigiiffik meeqqanut inuusuttunullu 30-t inorlugit ukiulinnut aaqqissuussinernik ingerlatsisarnissaat.
Naalakkersuisut nalilerpaat piumasaqaat tamanna KIK-imit naammassineqanngitsoq, KIK'p maleruagassaani ersermat kattuffiup siunertarigaa ilinniagaqartut soqutigisaat sulissutigissallugit tassalu imaappoq ilaasortaasut soqutigisaat.