Skip to main content

Aqqaluartaa Olsen inersimasut VM-ernissaannut annguttoq

Tysklandimi Altenbergimi IBU Cup-imi ooqattaasaatigaluni ujakkaarnermi Øystein Slettemark kalaallini angusarissaarneruvoq

Aqqaluartaa Olsen ooqattaajutigaluni ujakkaartartutut inuusuttutut suli ukioq ataaseq sinneruttoq inersimasut VM-ernissaannut annguppoq. Aqqaluartaa inuusuttut VM-ernissaannut toqqarneqarami sapaatit akunnerat qaangiutiinnartoq inersimasut VM-ernissaannut, marsip aallartinnerani Ruslandimi Khanty Manslysk-imi ingerlanneqartussamut annguppoq.Tysklandimi Altenbergimi IBU-cup-imi unammisut 130-t nunanit 25-neersut akornanni unamminermi nunat tamat piumasaqaataat anguvai, Grønlands Biathlon Forbund ilisimatitsivoq.

Aqqaluartaa Olsen nunatsinnit VM-imut annguttut pingajoraat. Øystein Slettemark aamma Kristian Kristoffersen qangali anngutereeramik. Uiloq Slettemark siornali annguppoq, aatsaalli unammerusuppoq uini Øystein ooqattaasarluni ujakkaarnermut taarsiullugu ujakkaarnerinnarmi unammeqataassappat.

Grønlands Biathlon Forbund-ip iluarusuutigeqaa inersimasut VM-ernerannut pingasut anngummata. Tamatuma takutippaa ikikkaluartunik kisiannili ilumoorussisunik patajaatsunillu unammisartuuteqaratta. Decembarip 19-ianili sungiusartarluta unammisarlutalu katersuuppugut, ilungersuuteqarnerpullu pissarsissutigilluarparput, kattuffik tusagassiuutitigut nalunaarummini allappoq.

Tysklandimi Altenbergimi unamminermi Øystein Slettemark angusarinnersaavoq. Ooqattaasarfimmi ujakkaarfimmilu pissutsit ajornakusooraluartut ukioq manna angusaani pitsaanersaavoq. Sialuk anorsaalungaatsiarneralu ajornakusoortitsipput. Øystein-illi takutippaa nukittoriartorluni, unammiffimmilu ujakkaarluarluni, 63-ississaattut inissilluni, ujakkaartut sukkanersaanit, østrigimiumit Michael Hausern-imit, 1.58 minutsiinnarnik kigaannerulluni.

Pallorluni seqqortaarnermi siullermi Øystein seqqortaarfik anorleraluaqisoq unammiffimmi matumani perngaammik uniunngitsoorpoq. Nikorfalluni seqqortaarneq iluatsinngilaa, qanorlu pisoqarsimanera Øysteinip nassuiaatigaa: "Tyskeq minutsip affaanik uannik qaangiisimasoq apuuteqatigaara.Uattulli pallorluni uniunngitsoorsimavoq. Sanileriippugut anorleqaarlu. Inoriaqquuminissaa utaqqivarput, sivitsunngitsorli naliliivunga utaqqisinnaajunnaarlunga seqqortaalerlungalu. Sanilera aamma taamaaliorpoq. Tallimariarluni uniorami kamaqaaq. Uanga sisamat uniorpakka. Pitsaavallaanngikkaluarpoq, katillugilli sisamanik uniornera ajorpallaanngilaq, pissutsimmi ajornakusooqisut ataanni uniortoqangaatsiarpoq", kattuffiup tusagassiutitigut nalunaarutaani allassimavoq.

Øystein 3,3 km kingulliit naggataarluarpai, sukkanerit 53-issaattut inissilluni. Øystein katinneranni 73-inngoerpoq, ajugaasumit Schweiz-imeersumit Thomas Frei-imit 3,48 minutsinik kigaannerulluni.

Aqqaluartaa Olsen Øysteinimit ataatsimik uniornikinneruvoq, ujakkaarfimmili 1,20 minutsinik kigaanneruvoq, nr. 101-itut inissilluni, taamaattorli International Biathlon Union-ip VM-imut anngunnissamut piumasaqaataasa iluanni.

Kristian Kristoffersen nikorfalluni toraajusarnini atatiinnanngitsoorpaa, nikorfallunilu marloriarluni uniorluni. Pallorluni pingasoriarluni uniorpoq. Ujakkaarfimmilu Kristian pisarnermit kigaanneruvoq, Øysteinimit 1,05 minutsinik kigaannerulluni. Taamaalilluni normu 105-inngorami Aqqaluartaamit inissiffinnik sisamanik kinguarluni.

Kalaallit ooqattaatigalutik ujakkaartartut sungiusariartorlutik angerlassapput. Aqqaluartaa 26. januar Tjekkialiassaaq inuusuttut VM-ernerannut peqataajartorluni. Kristianimut aamma Øysteinimut nunat tamat unammisarneranni sivisujaamik unikkallarfiussaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER