Aqqaluartaa Olsen Inuusuttut VM-ernerannut toqqagaavoq
Grønlands Biathlon Forbundip neriuutigaa ooqattaasaatigaluni sisoraatinik oqilaniulluni VM-imi Sisimiormiu inuusuttoq nunatsinneersut pingajorisinnaagaat. Allat marluk tassaapput Kristian Kristoffersen aamma Øystein Slettemark.
Aqqaluartaa Olsen, Sisimiormiu, Tjekkiami Nove Mesto-mi ooqattaasaatigaluni sisoraatinik oqilaniullni cup-imi ilaarngaarnermini angusarissaarpoq.
Aqqaluartaa, aappaagu aamma ooqattaasaatigaluni sisoraatinik oqilaniunnermi inuusuttuniittoq, inersimasuni unammeqataavoq angusarissaarlunilu. Sisamariarluni ooqattaasarluni 20 kilometerimut oqilaniunnermi 19-iinnarnik ukiulik Aqqaluartaa peqataasunit 126-init nr. 89-iuvoq. Aqqaluartaa peqataaqqaarnermini annilaangarpasinngilaq, 20-inillu aallaariarnermini tallimaannarnik uniorluni (1+2+0+2). Aamma oqilaniuffimmi inuusuttuugaluarluni ingerlalluarpoq oqilaniunnermilu katillugit nr. 80-iulluni. Inersimasut VM-erneranni peqataanissamut nunat tamalaat piumasaqaataat Aqqaluartaap taamaallaat 1,8%-imik inulaarpaa.
Aqqaluartaa Olsen angusamigut Inuusuttut ooqattaasaatigaluni sisoraatinik oqilaniullutik VM-ernissaannut angusilluarpoq, tamannalu Tjekkiami Nove Mesto-mi unammiffianni januaarip naalernerani ingerlanneqassaaq. Tamatuma saniatigut Grønlands Biathlon Forbundip neriuutigaa Sisimiormiu inuusuttoq ooqattaasaatigaluni sisoraatinik oqilaniulluni Inersimasut VM-ernissaanni, Ruslandimi Khanty Mansiysk-imi ingerlanneqartussami, peqataasut nunatsinneersut pingajorisinnaagjaat.
Kristian Kristoffersen ooqattaasartarfimmi tupaallatsitsisarnini nangippaa, nikorfalluni ooqattaasarnermi suli 90€%-t angusarpai.
Kristian Kristoffersen kalaallini angusarissarnersaavoq. Ooqattaasarluarnermigut 20-eriarluni aallaariarami pingasuinnarnik uniorpoq. Nikorfalluni uniornituaa allaat pissuteqarpoq eqitsinerliorluni aallaat aallartoortimmagu. Kristian nr. 73-itut inissippoq.
Øystein Slettemark oqilaniuffimmi suli ingerlalluartarpoq oqilaniunnermilu nr. 54-iulluni, Kristianimit 1,35 minutsinik Aqqaluartaamillu 1,58 minutsinik sukkanerulluni. Ooqattaasarnermili unioqattaarujussuarami minutsinillu marlunnik pillaaserneqarami pissutigalugu pallorluni ooqattaasarnermi sisamaananrnik aallaariarami angusalunnerpaat serberit, usbekerit, tuluit ungarnimiullu akornanniippoq.
Tullianik 10 km sprintimut unamminissami Aqqaluartaap, Kristiaap Øysteinillu ilagissavaat Piitaaraq Skifte. Nunani tamalaani ooqattaasaatigaluni sisoraatinik oqilaniunnermi kalaallit aatsaat taama amerlatigisut peqataassapput.