Skip to main content

Tunumi nannuttassat amerlineqarput

Ammassalimmi Illoqqortoormiunilu nannuttassat Ane Hansenip amerlivai

Naalakkersuisunut ilaasortaq Ane Hansen januaarip 3-anni aalajangerpoq Ittoqqortoormiini Ammassalimmilu 2011-mi nannuttassat tamani tallimanik amerliniarlugit.

Tamatumunnga tunuliaqutaavoq inatsisartunut ilaasortap Harald Biancop (IA) marlunnik apeqquteqarnera. Taassuma apeqqutigaa 2011-mut Tasiilap eqqaani nannuttasat Naalakkersuisut amerlerusunneraat.

Tassunga Ane Hansen akivoq ingerltsivimmi Ammassalimmik 2009-mi 2010-milu 20-nik pisassiisoqartarsimasoq. Inassutigineqarsimavoq pisassat tamakkua 2011-mi 2012-imilu atuutsinneqassasut, naatsorsuutigineqanngimmat biologinit nutaanik paasissutissiisoqassasoq, 2011-2012-imut pisassanik sunniisinnaasunik.

Naalakkersuisulli ukiumut pisassiiffimmut 2011-mut tunumi pisassat qulinik ilarusuppaat innersuussutigalugu Kommuneqarfik Sermersuumit saaffigineqarsimaneq. Tassa imaappoq ingerlatsivinni Tasiilami Ittoqqortoormiinilu pisassat 2009-mi 2010-milu pisassanit tallimanik amerlineqarput.

Ukiumi pisassiiffiusumi pisassat qaangerneqarpata taakkua tullianit ilanngaatigineqassapput. Piffik piniarfik naappat pisat tamarmik kisinneqeassapput tamatumalu kingorna 2011-mi pisassat nalunaarutigineqassapput, Ane Hansen paasissutissiivoq.

– Suli naluarput kisitsineq kinguneqassanersoq pisassat amerlinerannik ikilinerannilluunniit. Pisassat amerlassusissaannut ilaatigut apeqqutaassaaq kisitsinissap inernera, Ane Hansen oqarpoq.

Tunumi nannut taamaallaat nunatsinni piniarneqarput (tassa Tunumi kujataanilu Paamiut kujataanni). Tunumi nannut amerlassusaannut paasissutissaqannginneq pissutigalugu Pinngortitaleriffik nungusaataanngitsumik Tunumut innersuussisinnaanngilaq. Nalorninartoqarnera tamana pissutigalugu Pinngortitaleriffik isumaqarpoq Tunumut pisassiinermi mianersortoqartariaqartoq.

Taamaattumik Harald Bianco aamma aperivoq Naalakkersuisut 2011-mi Tunumi ilisimatuussutsikkut kisitsissamaarnersut.

Tamatumunnga Ane Hansen akivoq misissuinissamik pilersaarutit 2013-imut kinguartinneqarsimasut. Kinguartitsinerup kinguneranik Kitaani kisitsineq iliutigalugu Tunumi kisitsineq ingerlanneqarsinnaanngilaq. Tamanna peqatigalugu oqaatigaa Tunup isorartunerujussua pissutigalugu misissuinissaq nukinnik aningaasanillu atuinartorujussuussasoq.

Misissuinissanulli tamakkununnga piareersarnerit 2012-mi aallarteriissapput.

Ane Hansenip ilanngulluguoqaatigaa Tunumi nannut amerlassusaannik ilisimasavut amigaateqartut. Taamaattumik Pinngortitaleriffik 2011-mi Nunap Isuata Tasiilallu akornanni nannut amerlassusaannik misissueqqinniarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER