Qallunaat naalakkersuisuisa atorfilittaat misissuiffigineqassasut
Nunarput aqqusaarlugu CIA timmisartuussisimasoralugu pingasunnngornermi folketingimi oqallinnissaq sioqqullugu danskit pappiliaataat atuarneqarsinnaapput
Unioqqutitsilluni tigusanik angallassisarsimanerit, amerikamiut isertortumik paasiniaasartui CIA Nunarput aqqusaarlugu pisimasorineqartut pillugit pasitsaassinermi, qallunaat naalakkersuisuisa atorfilittaat illuatungiliuttut alakkartersinnaavaat.
Tallimanngornermi Nunanut allanut tunngasuni Ataatsimiititaliaq ataatsimiimmat paasinarsilluarpoq, nunanut allanut ministerip Lene Espersenip (K) kukkusumik pisoqaarsimanera ilumuunnginnerarlugu.
Ataatsimiinnermi ilaatigut peqataavoq Enhedslistenimit Frank Aaen, danskit pappiliaataannik nassaassaasunik takunnerusuttoq.
- Qujanartumik qallunaat assigiissunik malittunik pappiliaateqartarput. Nunanut allanut ministereqarfimmi takusinnaavagut. Ulluni qaninnerni misissussavakka, Frank Aaen oqarpoq.
Taamaalilluni pingasunngornermi Folketingimi apeqqarissaarnissamut piareersarluarsimalluni ataatsimiigiassaaq.
Amerikamiut Danmarkimi aallartitaatarisimasaata James Cain-ip nalunaarutaani ersippoq, danskit naalakkersuisui avammuinnaq paasinartut suliaq qaqilerneqassasoq. Puigorneqariartuinnassasorli. Danskit atorfilittaasa oqaloqatigisarnerannit taama paasinnissimavoq.
Nalunaarut WikiLeaks-imit tamanut saqqummiunneqarpoq. Danskit naalakkersuisuisa uppernarsaatit oqaaseqarfigiumanngivissornerannut tamanna tunngavilersuutigaat.
SF'imiilli Holger K. Nielsen taamaaliorusuppoq.
- Marloqiusamik iliortoqarsimanera pasinarluinnarpoq, illuatungaatigut suliaq misissorneqassasoq oqarlutik, aappaatigulli amerikamiut eqqissisarpaat oqarlutik, suliaq iternga tikillugu misissorneqassanngitsoq, Holger K. Nielsen oqarpoq.
- Tamanna WikiLeaksip uppernarsaataani ersarilluarpoq. Tamanna ullumi ataatsimiinnermi nunanut allanut ministerip ilumuunnginneranngilaa, oqarpoq.
/ritzau/