Skip to main content

Aningaasartuutigut appartittussaavagut

Taamaaliunngikkutta ukiut 3-4 qaangiuppata ingerlasinnaajunnaassagut, Air Greenlandip pisortaanerat Michael Binzer timmisartortartunut aaqqiagiinngissuteqarnermik sooq maannakkut ingerlatsisariaqarneq pillugu nassuiaanermini oqarpoq

- Timmisartornermi bilitsit akikinnerusariaqarput. Sullittakkavut aamma piginnittuvut taamatut piumasaqaateqarput. Unammilleqatigiinnerup tamanna aamma pisariaqartippaa. Taamaattumik uagut aningaasartuutivut appartittariaqarpavut taamaattumillu maanna tikillugu timmisartortartut isumaqatigiissutaat peqataaffigisinnaajunnaarparput. Aningaasarsiat sivisunerusumik timmisartorsinnaanermik kinguneqartariaqarput, Michael Binzer oqarpoq,

Aqqiagiinnginnermi timmisartortartut 106-it aamma timmisartuni saqisut 55-it, suliartoqqusaanatik mattunneqarput. Tassa immaappoq suliffeqarfimmi atorfeqarnerat unippoq, tamatumalu kingunerisaanik atorfimminnut atatillugu inigisaminnit anisariaqassasut aqqiaagiinnginneq sivisooq angullugu ingerlassappat.

Pissutsit tamaanga killipput illuatungeriit isumaqatigiinniarnermi imminnut naaperiarsinnaannginnerat pissutaalluni, maannakkorpiarlut isumaqarnarpoq aaqqiagiinnginneq sivisooq anngullugu ingerlasinnaasoq. Air Greenland tunniutiinnarusunngilaq, apeqqummullu qanoq sivisutigisumik Air Greenlandip aaqqiagiinnginneq nammassinnaaneranut, akissutigineqartoq takinngilaq - Sivisuumik!

- Aningaasaqarnikkut ukiut pitsaasut aqqusaarsimavagut, kisianni siumut takorluuilluta isumaqarpugut ajornartorsiulissalluta maannakkut arlaannik iliuuseqanngikkutta, pisortaq oqarpoq.

Pisoq ajuusaarutigaa

- Pisoq ajuusaarutigaarput kisianni timmisartortiteqatigiit ullumikkut Kalaallit Nunaanni timmisartornermik ingerlatsisartut unammillersinnaasariaqarpavut, taakku aamma siunissami Nunatsinni timmisartuussinermik ingerlatsiniarput. Tamatuma kingunerisaanik aningaasartuutivut appartittariaqarpavut, taamaaliunngikkutta ukiut pingasut, sisamat ingerlanerini niuerutissaarutissaagut, nalilersuivoq.

- Piginnittuttalu uagut unammillertinnut ilaaniarlutik toqqartalerpassuk, taakku akikinnerunerat pissutigalugu, taava uagut iliuuseqartariaqarpugut, Michael Binzer erseqqissaavoq.

- Nunatsinni timmisartuusinermi assigiinngitsunik aningaasartuuteqarpoq uagut sunniuteqarfisinnaanngisatsinnik. Tassaapput akileraartut aamma mittarfinnut akiliutit taakku nunami namminermi timmisartornermi bilitsip akiata 26 procenteraat. Naatsunik mittarfeqarpoqm tamakkulu uagut akikinnerusunik timmisartorsisinnaanitsinnik killilersuipput. Kisianni aningaasartuutit uagut sunniuteqarfigisinnaasavut taakku uagut iliuuseqarfigisariaqarpavut. Ukioq 2009-mi sorarsitsiortorpugut tamatumalu kingorna timmisartuutigut naleqqussarpavut, kiisalu Boeing 757-iuterput aamma helikopterit Bell-222 tunillutigit. Maannakkut timmisartortartut isumaqatigiissutaat akisoqisut sammisariaqarpavut.

Timmisartortartut aningaasarsiaat

- Uanga erseqqissaatigerusuppara timmisartortartut naammassisartagaat aamma sulisarnerat akuersaaratsigit ataqqillugillu. Kisianni nalunaaquttap akunneri qanoq amerlatigisut timmisartornermut atorneqartarnerat aningaasanut sanilliullugit isigisariaqarparput.

- Air Greenlandimi timmisartortartut aningaasarsiarissaarput, Michael Binzer isumaqarpoq.

Timmisartumi aquttup aatsaat ilinniakkaminik naammassinnittup aningaasarsiarai 500.000 koruunik missaanniittut. - Qaammatit 15-it ilinniagaqareerluni aningaasarsiat pitsaalluinnarput, Michael Binzer isumaqarpoq.

Kiisalu timmisartortatut naalagaat utoqqaanersaq ukiumut 1,5 millionit koruuninit aningaasarsiaqarpoq. Aningaasarsiani pineqartunik tapisiat ilanngunneqareerput.

Timmisartortartut ukiumut ulluni 192-ini sulisarput taakununnga ilanngunneqassapput ullut arfinillit ilinniaqqinnermut atorneqartussat, taakku pisortanit piumasaqaataasut aamma nalinginnaasumik pikkorissarnerit aamma ilinniaqqinnerit sulisitsisumit akilerneqartartut avataaniipput. Nalunaaquttap akunnerinut naatsorsorlugit timmiarsartortartut ukiumut nalunaaquttap akunnerini 800-t aamma 1200-t akornanni sulisarput. Nalinginnaasumi sulisut ukiumut nalunaaquttap akunnerini 1880-ini sulisarpoq.

Timmisartortut naalagaasa aningaasasiaat qaffaseqisut pissutaallutik, timmisartortartut arlallit Air Greenlandimi pisortatut inissisimasut ilaannit amerlanerusunik aningaasarsiaqarput - Michael Binzer eqqarsaatigissanngikkaanni.

- Uanga erseqqissaatiginiarpara piumasarisimannginnatsigu timmisartortartut aningaasarsiatik appassgaat. Uanga nammineerlunga aningaasarsiakka apparput, kiisalu sulisunut pisortatut inissisimasunut inassutigisimavara taamatut inisisimatilluta aningaasarsiamik qaffannissaanik piumasaqarnaveersaaqqullugit, Michael Binzer oqarpoq.

Air Greenlandip piumasaqaataa aamma neqeroorutai

Pisortaasut timmisartortartunut neqeroorutaat tassaapput, aningaasarsiat nikerarfianni 31-usuni qaffasinnerpaat tallimat peerneqarnissaat. Taammaattorli timmisartortartut aningaasarsiat nikeriarfiinni taakkunani inissisimareersut aningaasarsiatik pigiinnassavaat. Eqqorneqartussat tassaapput timmisartortartut inuusunnerit suli taamatut qaffasitsigisumut anngussimanngitgsut.

Pisortaasut sulinngeqartarneq pingaarneq qaammammik ataatsimik sivitsorniarpaat (ullumikkut 1. juuni 31. aggusti). Piffissap sulinngiffeqarfiusartup pingaarnerusup suliffeqarfiup ulapiffiginerpaasa eqqortarpaa, tamatumalu kingunerisaanik suliffeqarfiup timmisartortartut akilertariaqartarpaa timmisartuinnarniassammata. Tamanna imaappoq timmisartortartut piffissami allami sulinngiffeqartariaqartarput. Kisianni tamanna suliffeqarfimmut immikkut aningaasartuutaalluni.

Pisortaasut maannakkut ullut ilinniaqqinnermut atorneqartartut atorsinnaalerusuppaat, taamaalillutik ullut suliffiusartut 192-iniit 198-inut amerlissallutik.

Pisortaasut akit qaffakkiartortarnerat malillugu 2011-mi aamma 2012-mi qaffaasoqarnissaa pinngitsoortinniarpaat 2013-imut utaqqisikkusullugu. Kisianni ukiut tamaasa nikeriarnermik ataatsimik aningaasarsiat qaffattarput, taamaalillutillumi aningaasarsiaat qaffattarlutik. Tamatumani taamaallaat timmisartortartut aningaasarsiat qaffasinnerpaaniiffianeereersut pineqanngillat.

Pisortaasut 2013-imi timmisartortartut aningaasarsiaat ukiumi ataatsimi uninngaannartikkusuppaat. Tamatumunnga taarsiullugu akit qaffakkiartortarnerat malillugu aningaasarsiaat qaffatsinneqassapput.

- Taamaaliornikkut timmisartortartut ukiut tamaasa aningaasarsiaat qaffattassapput, Michael Binzer oqarpoq - tamatumani timmisartortartut aningaasarsiat qaffasinnerpaaffianut killissimasut taamaallaat pinnatik.

Pisortaasunit timmisartortartut piumasaqaataat assigiinngitsut piffissamut sulinermut aaqqissuussinermut tunngasut aamma tapisianik arlalinnik qaaffanerit akuersaareerpaat.

Kiisalu pisortaasut isumaqatigiissutini erseqqissaateqarusussimapput, tassa timmisartortartut alajangeeqataasinnaasut kisiannili aalajangiinermik unitsitsisinnaanngillat.

- Pisortat tassaapput suliffeqarfimmit aqutsisut, Michael Binzer erseqqissaavoq.

Sulittakkat

- Uanga assut ajuusaarutigaara sullittakkavut aamma inuiaqatigiit pissutsinut taamaatunik nalaataqartikkatsigit. Kisianni pissutsit taamatut ittut pinngitsaalivaatigut. Isumaqatigiissutit taakku siornatigornit kingornussimasavut akissaqartinngilavut. Nunatsinni pissutsit nutaanngorput avataaneersunit annertunerusumik unammillerneqarpugut, tamakkulu uagut isummersorfigisariaqarpavut. Michael Binzer naqissusiivoq.

Aqqiagiinngissuteqarnerup kingunerisaanik timmisartornissat pingasunngornerup 12. januaarip tungaanut tamarmik taamaatinneqarput. Tamatuma kingorna ullut tamaasa ullup tulliani timmisartornissat nalilersorneqartassapput.

– Bilitsit 22. januaari ilanngullugu atuuttussaasut utertinneqarsinnaanerat neqeroorutigaarput apeqqutaatinnagu biltsip qanoq ittuunera.

– Angalanissanik tamanik januaarip 29-at ilanngullugu tuniniaanerput tamaat unitsipparpiut.

– Sulittakkatta bilitsisiatik utertikkusunngippatigit taava taakku uagut atortutinniiginnassapput kiisalu aallarnissamut siullermut tulleriiaarlutik inissaqarneq apeqqutaatillugu aallartassapput. Ilaasut Nunatsinni ingerlaqqissinnaajunnaarlutik unissimasut namminnerlu allamik periarfissaqanngitsut Air Greenlandip unnuinerat, ullaakkorsiornera aamma mittarfimmut mittarfimmiillu ingerlanerat akilertassavaa. Ilaasunut Danmarkimiittunut aamma Islandimiittunut tamakku saniatigut ullo'qeqqanut aamma unnukkut nerisaqarnerat akilerneqartassaaq, ilaasut taakku allamik periarfissaqanngippata.

Air Greenlandip toqqaannartumik saaffiginnittarfik aaqqiagiinngineq tamakkerlugu ullut tamaasa ammasartussaq pilersippaa.

Nunatsinni ammasarfiit tassaapput 08.00 - 20.00 nunatsinni nalunaaqutaq malillugu. Telefonip normua tassaavoq: +299 34 33 35. Email: kontakt@airgreenland.gl

Danmarkimi ammasarfiit tassaapput 07.00 - 23.00 Danmarkimi nalunaaqutaq malillugu. Telefonip normua tassaavoq: +45 32 46 22 43. Email: glcopenhagen@airgreenland.dk

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER