Nordisk Energikommune 2011-mut qinnuteqartorpassuit
Kalaallit Nunaanni Qaasuitsup Kommunia unamminermut peqataniarluni nalunaarsimavoq peqataanissamullu qinnuteqarsimalluni, Kanukoka paasissutissiivoq
Nunani avannarlerni kommunit 44-t Nordisk Energikommune 2011-mik unamminermi peqataapput.
Unammineq siorna oktobarip 25-ianni nunat avannarliit nukissamut ministeriinit aallartinneqarpoq, nunani avannarlerni kommunit nukissamik silallu pissusianut aaqqiissutissanik pitsaasunik suliniuteqarnerat tapersersorniarlugu saqqumilaarnerulersinniarlugulu. Suliniutissatut siunnersuutinut tunniussinissamut killissarititaq qaangiutereerpoq, Kanukoka tusagassiorfinnut nalunaarummi allappoq.
Kommunit qinnuteqartut amerlassusaasa takutippaa nunani avannarlerni kommunit unammilleqataarusuttut Nunat Avannarliit CO2-mik aniatitsiunnaarnissaanut, imaluunniit ikummatissanik nunap iluaneersunik isumalluuteqarunnaarsinnissaanut, qorsummillu siuariartorneq sammillugu, suliniuteqartut naliliipput.
Kalaallit Nunaanni Qaasuitsup Kommunia unamminermi peqataaniarpoq qinnuteqaammillu nassiussisimalluni.
Tupigusuutigineqarsinnaavoq Kommune Kujalliup peqataannginnera, kommuni illuutimini nukissamut allaanerusumut aningaasaliissuteqarsimammat.
Qinnuteqaatit tamarmik nunami naliliinermut komitémit nalilerneqassapput, nunanilu imaluunniit namminersorfiusuni tamani kommunit pingasut angullugit inassutigisinnaallugit. Kommunit unamminissamut toqqarneqartut tamarmik marsip qiteqqunnerani tamanut saqqummiunneqassapput, Kanukoka paasissutissiivoq.
Nordisk Energikommune 2011-mut peqataassagaanni kommuni nukissamik suliniummik saqqummiussissaaq, assersuutigalugu nukissamik ataavartumik imaluunniit nukissmik atuinermik pitsanngorsaanermik, takutitsisumik kommuni immikkut iliuuseqartoq aaqqiissutinik maligassiuisunik nutaaliortitsisunillu, nunap immikkoortuani siuariartornermik qorsummik ineriartornermillu pilersitsisumik, tamannalu peqatigalugu nukissioriaatsimik CO2-mik aniatitsinngitsumik imaluunniit nukissamik nunap iluaneersumik isumalluuteqanngitsumik takorluuinermik piviusunngortitseqataasinnaasumik.
Kommunit toqqarneqartut tamarmik unamminermi ingerlaqqissapput upernaarulu kingusinnerusukkut nunani avannarlerni naliliinermut komitémit, nunanit avannarlernit tamanit ilaasortalimmit, nalilerneqassallutik. Nordisk Energikommune 2011 juunip qiteqqunnerani Filandimi pisoqartitsineratigut toqqarneqassaaq.
Quppernermi nittartakkami www.nordicenergymunicipality.og suliniut pillugu paasissutissaqarpoq itisiliisunik, unamminermut peqataanissamut qinnuteqaateqarluni il.il. Qupperneq nittartagaq nunani avannarlerni avataanilu kommunini nukissamik aaqqiissutissarpassuarnik nittarsaaviussaaq suliniutillu piukkunneqartut tamarmik quppernermi nittartakkami saqqummiunneqassapput.