Nunatta oqaluttuarisaanerani nutaarsiassaq pingaarutilik
Cand.mag Jens Heinrichip decembarip 15-ianni 2010 ph.d.-tut soraarummeerutini saqqummiuppaa, sammillugu Eske Bruun aamma nunatta atugarissaarfiusup 1932-imiit 1964-imut pilernera.
Jens Heinrich ph.d.-ngorpoq.
Pingasunngormat decembarip 15-ianni nunatta atugarissaarfinngornerani Eske Bruunip inissisimaneranik soraarummeerussunni Ilisimatusarfimmi saqqummiuppaa. Naliliinermut ataatsimiititaliap isumaqatigiissup inassutigaa Jens Heinrich ph.d-tut angusitinneqassasoq.
Saqqummiussami Eske Brrunip nunatsinni 1932-imiit 1964-imut inuiaqatigiit ineriartorneranni pingaaruteqassusia qulaajarneqarpoq - samminerullugulu Kalaallit Nunaata atugarissaarfiusup ilusilersorneqarnerani Eske Bruunip pingaaruteqassusia.
Eske Bruun sorsunnersuup kingulliup nalani nunami naalagaasutut nunatta atugarisaani tamarmiusumi pingaaruteqarsimavoq. Nunatsinnik Danmarkimiiginnartitseqataasimavoq, pingaartumik USA-mut nunatsinnilu innuttaasunut atatillugu, qallunaat Kalaallit Nunaannut politikkiannik attassiinnarnermigut. Sorsunnersuarli pissutigalugu Kalaallit Nunaat arlalitsigut inuiaqatigiittut matoqqasuujunnaarpoq illersugaajunnaarlunilu.
Sorsunnersuup kingorna nunatta nutarteriffigineqarnissaa qallunaallu nunatsinnut politikkiata nutarteriffigineqarnissaa pisariaqaleraluttuinnarput. Esken Bruun tamakkuninnga ineriartortitsisuuvoq, siullermik Grønlands Selvstyremi pisortap tullianut kingorna Kalaallit Nunaannut Ministeriaqarfimmi pisortatut departementschefitullu.
Allattugaatinilli peqqissaartumik misissuinikkut tunngavilersorluakkanillu misissuinikkut saqqummiussami tikkuarneqarpoq Eske Bruunimik isiginnittarnitoqaq, tassa sorsunnersuup kinguninngua allanngortiterilerneq qularnartoqarallarmat, mianersornerusumik oqaluttarsimammat ukiuni kinguliininngarnit, Kalaallit Nunaata Danmarkimut atalivinniissaanik peqqussut nutaaq anguniagassatut akuerineqarneraninngarnit.
Naliliisut inerniliipput Jens Heinrichip suliaa nunatta oqaluttuarisaaneranik ilisimatusarnermi pingaarutilimmik tapersiisoq aqqutissiusisutullu isigalugu saqqumimussakkut landsrådit nunatsinnilu politikerit inuiaqatigiit ineriartornissaannik nunattalu aaqqissuusseqqinnermik ingerlatsinissaanik manna tikillugu isigineqartumit pingaaruteqarnerujussuusimasut.
